BIG NEWS / હવે J&Kમાં રહેતા બિનકાશ્મીરીઓ પણ કરી શકશે મતદાન, ચૂંટણી પંચની જાહેરાતથી રાજકીય પક્ષો ધૂંઆપૂંઆ

• જમ્મુ-કાશ્મીરમાં ચૂંટણી આયોગ દ્વારા મોટો નિર્ણય લેવાયો
• કાશ્મીરમાં રહેતા બિનકાશ્મીરીઓ પણ મતદાન કરી શકશે
• બિનકાશ્મીરીઓને કોઇ જ સરનામાના પુરાવાની જરૂર નથી

જમ્મુ-કાશ્મીરના મુખ્ય ચૂંટણી અધિકારી હૃદેશ કુમારે કહ્યું કે, 'જે બિન-કાશ્મીરી લોકો રાજ્ય (કાશ્મીર) માં રહે છે  તેઓ પોતાનું નામ વોટર લિસ્ટ (મતદાર યાદી) માં સામેલ કરાવીને મતદાન કરી શકે છે. એ માટે તેઓને સરનામાના પુરાવાની જરૂર નથી. માત્ર એટલું જ નહીં તેઓએ કહ્યું કે, જમ્મુ-કાશ્મીરમાં સુરક્ષા માટે તૈનાત સુરક્ષાદળોના જવાન પણ મતદાર યાદીમાં પોતાનું નામ સામેલ કરાવી શકે છે.

જમ્મુ કાશ્મીરમાં રહેતા બિનકાશ્મીરી લોકો પણ કરી શકશે મતદાન, ચૂંટણી પંચની જાહેરાતથી 25 લાખ નવા મતદાતાઓની નોંધણી થવાની શક્યતા#JammuKashmir

— VTV Gujarati News and Beyond (@VtvGujarati) August 18, 2022

નામ સામેલ કરાવવા કોઇ સ્થાનિક નિવાસ પ્રમાણપત્રની જરૂર નહીં

હૃદેશ કુમારે બુધવારના જણાવ્યું કે, જમ્મુ-કાશ્મીરમાં આ વખતે અંદાજે 25 લાખ નવા મતદારોના નામ મતદાર યાદીમાં સામેલ થવાની આશા સેવાઇ રહી છે. તેઓએ જણાવ્યું કે, કર્મચારી, વિદ્યાર્થી, મજૂરવર્ગ અને અન્ય કોઇ પણ બિન કાશ્મીરી કે જે કાશ્મીરની અંદર રહી રહ્યાં છે તેઓ પોતાનું નામ મતદાર યાદીમાં સામેલ કરાવી શકે છે. તેઓએ જણાવ્યું કે, મતદાર યાદીમાં નામ સામેલ કરાવવા માટે કોઇ પણ પ્રકારના સ્થાનિક નિવાસ પ્રમાણપત્રની જરૂર નથી. એ સિવાય જમ્મુ-કાશ્મીરમાં તૈનાત જવાન પણ મતદાર યાદીમાં પોતાનું નામ સામેલ કરાવી શકે છે.

મતદારોમાં મોટા પાયે વધારો થવાની શક્યતા

હૃદેશ કુમારે જણાવ્યું કે, જમ્મુ-કાશ્મીરને વિશેષ દરજ્જો આપનાર કલમ ​​370 નાબૂદ થયા બાદ પ્રથમ વખત મતદાર યાદીમાં વિશેષ સુધારો કરવામાં આવી રહ્યો છે. ત્યારે આવી પરિસ્થિતિમાં આ વખતે મોટો ફેરફાર થવાની શક્યતા દેખાઇ રહી છે. માત્ર એટલું જ નહીં ત્રણ વર્ષમાં મોટી સંખ્યામાં યુવાનો 18 વર્ષ કે તેથી વધુ ઉંમરના થઇ ગયા છે.

જમ્મુ-કાશ્મીરમાં હાલમાં 76 લાખ મતદારો

તેઓએ કહ્યું કે, 15 સપ્ટેમ્બરથી મતદાર યાદીમાં નામ સામેલ કરવાની પ્રક્રિયા શરૂ થશે કે જે 25 ઓક્ટોબર સુધી ચાલશે. જો કે, દાવાઓ અને વાંધાઓનું નિરાકરણ 10 નવેમ્બર સુધીમાં કરી દેવામાં આવશે. હૃદેશ કુમારના જણાવ્યા અનુસાર, જમ્મુ-કાશ્મીરમાં 18 વર્ષથી વધુ ઉંમરના લગભગ 98 લાખ લોકો છે, જ્યારે અંતિમ મતદાર યાદી મુજબ સૂચિબદ્ધ મતદારોની કુલ સંખ્યા 76 લાખ છે.