VIDEO: સૌરાષ્ટ્ર-ઉ.ગુજરાતમાં ક્યાંક-ક્યાંક માવઠું જગતના તાતની ચિંતામાં વધારો

જામ ખંભાળીયામાં અચાનક વાતાવરણમાં પલટો આવતા કમોસમી વરસાદ પડયો છે. ભણખોખરી ભાણવારી મોટી ખોખરી સહિતના ગામડાઓમાં કમોસમી વરસાદ થયો હતો. જોકે કમોસમી વરસાદના કારણે ઉનાળુ પાકને નુકસાન થવાની ભીતિ સેવાઇ રહી છે. 

ઉલ્લેખનીય છે કે હાલ ઉનાળાનો માહોલ ચાલી રહ્યો છે ત્યારે સૌરાષ્ટ્રના કેટલાક પંથકમાં કમોસમી વરસાદ પડતા જગતનો તાત ચિંતામાં મુકાઇ ગયો હતો. આજરોજ વાતાવરણમાં અચાનક બદલાવ જોવા મળ્યો હતો અને થોડા સમય બાદ વરસાદ શરૂ થયો હતો. જેના કારણે સૌરાષ્ટ્રના ખંભાળીયાના ભણખોખરી ભાણવારી મોટી ખોખરી જેવા કેટલાક ગામોમાં વરસાદ વરસતા ગ્રામજનોમાં આશ્ચર્ય ફેલાયું હતું. જો કે કેટલાક સ્થળોએ તો ખાબોચીયા પણ છલકાઇ ગયા હતા.

આ સાથે ઉત્તર ગુજરાતના બનાસકાંઠા જિલ્લામાં પણ અચાનક વાતાવરણમાં પલટો આવેલ જોવા મળ્યો હતો મળતી માહિતી પ્રમાણે રાજસ્થાન અને ગુજરાતના સરહદી વિસ્તારમાં વરસાદી છાંટા પડયા છે.અમરીગઢ ઈકબાલગઢ સહિતના વિસ્તારોમાં પણ છાંટા પડયા છે. વાતાવરણમાં આવેલા બદલાવને જોઇને ખેડૂતોમાં ચિંતાનું મોજૂં ફરી વળ્યું હતું.