કાર્યવાહી / કચ્છઃ કેદીને સગવડો આપતો ભ્રષ્ટ જેલર લાંચ લેતા રંગેહાથ ઝડપાયો

કચ્છના જેલોમાં વ્યાપ્ત ભ્રષ્ટાચારનો વધુ એકવાર પર્દાફાશ થયો છે. ભુજની પાલારા ખાસ જેલનો જેલર કલ્યાણ વી. ગઢવી પંદરસો રૂપિયાની લાંચ લેતાં ઝડપાયો છે. કાચા કામના કેદીને જેલની અંદર ટિફિનની સગવડ આપવા સહિતની સવલતો તેમજ અંદર બીજી કોઈ હેરાનગતિ ના કરવા બદલ જેલર ગઢવીએ 1500 રૂપિયાની લાંચ માગી હતી.

આ અંગે અરજદારે સંપર્ક કરતાં ગાંધીધામ એસીબીએ જેલના પ્રાંગણમાં છટકું ગોઠવી ગઢવીને નાણાં સ્વિકારતાં રંગે હાથ ઝડપી લીધો હતો. ગઈકાલે કેરા ગામના સરપંચ દિનેશ મહેશ્વરીને 80 હજારની લાંચ માગવા બદલ એસીબીએ ઝડપ્યો હતો. આજે સતત બીજા દિવસે એસીબીએ સફળ છટકું ગોઠવી જેલરને ઝડપી પાડતાં ભ્રષ્ટ સરકારી કર્મચારીઓમાં ફફડાટ ફેલાઈ ગયો છે.

ઉલ્લેખનીય છે કે, અગાઉ ભચાઉ સબજેલમાં પણ લોન કૌભાંડ અને હત્યાકેસનો આરોપી જેન્તી ઠક્કર જેલની અંદર કૂલરની ઠંડી હવા અને નોકર-મોબાઈલની સગવડ સાથે દારૂ પીતાં ઝડપાયો હતો. જેમાં જેલગાર્ડ સામે પોલીસે ગુનો દાખલ કર્યો હતો. અલબત્ત, તે પ્રકરણમાં એકલાં જેલગાર્ડને સામે પગલાં લઈ જવાબદાર અન્ય મોટા માથાઓને બચાવી લેવાયાં હતા.