'એકાત્મ' ભાવ / બેન્ડ-બાજા સાથે કોંગ્રેસના પ્રમુખ પદે જગદીશ ઠાકોર સતારૂઢ; અમુક નેતાઓ કેકનો સ્વાદ લેવા'ય ના રોકાયા

• કોંગ્રેસ પ્રદેશ પ્રમુખ ભવ્ય રેલીથી પહોચ્યા કાર્યાલય 
• નેતા એટલા સૂર;  સરકારની સરિયામ નિષ્ફળતા 
• ઠાકોરની કેકનો સ્વાદ માણ્યા વગર જ નેતાઓ રવાના 

ગુજરાત કોંગ્રેસ પ્રદેશને જેટલા લાંબા ગાળે પ્રમુખ અને વિપક્ષી નેતા મળ્યા તેની આતુરતા અંતનો અને વિધાનસભા 2022 માટે તૈયાર હોવાના વાજા-બેન્ડ સાથે જગદીશ ઠાકોર પદાસીન થયા.સાબરમતી રીવર ફ્રન્ટ પરથી નીકળેલી બાઈક રેલી નવનિયુક્ત પ્રદેશ પ્રમુખનો શક્તિ પ્રદર્શન તરીકે જોવાયો કે કોંગ્રેસનો 'એકાત્મ' ભાવ, તે મુદ્દે જુદા કાર્યકરો અલગ-અલગ  મત દર્શાવતા હતા.  આ વચ્ચે, જગદીશ ઠાકોર અને વિપક્ષી નેતા સુખરામ રાઠવા ભવ્ય સ્વાગતથી પ્રદેશ કોંગ્રેસ કાર્યાલય પહોચ્યા હતા. 

ગુજરાત કોંગ્રેસનાં પ્રભારી રઘુ શર્માએ ઠાકોરના પદભાર સંભાળતા આપેલા પ્રાસંગિક ઉદબોધનમાં પૂર્વ પ્રમુખ અને વિપક્ષી નેતાનાં વખાણ કર્યા હતા. તેમને કહ્યું કે, અમિત ચાવડા અને પરેશ ધાનાણીમાં મેં સામર્થ્ય જોયું છે. પદ છોડવાનું નક્કી હતુ છતાં બંને નેતાઓ છેલ્લે સુધી કામ કરતા રહ્યા. જે ભાવનાથી બંને એ કામ કર્યું છે એ જોતાં બંનેનું ભવિષ્ય ઉજળું દર્શાવે છે. રાજ્યની ભાજપા સરકાર પર પ્રહાર કરતા પ્રભારી શર્માએ કહ્યું કે,ગુજરાતમાં કુશાસન અને અત્યાચાર છે. સાથોસાથ ગુજરાતમાં સરકાર નામની કોઈ ચીજ નથી.ગુજરાતના મોડલમાં કોઈ દમ નથી. ગુજરાતનું  મોડલ ખોખલું છે. રાજસ્થાન સરકારે કોરોનામાં ઇન્જેક્શન ફ્રી માં આપ્યા હતા. આ રાજ્ય સરકાર કોરોના મૃતકના આંકડાઓ સરકાર છુપાવે છે. કોંગ્રેસને રાજ્યમાં મૃતકોના 70-80 હજાર ફોર્મ મળ્યા હોવાનો દાવો પણ કર્યો હતો. શર્માએ ઉમેર્યું કે, કોંગ્રેસની સરકાર બનશે તો કોરોના મૃતકને સહાય અપાશે,ઉપરાંત પ્રથમ કેબિનેટમાં જ 4 લાખ સહાય ચૂકવવાનો નિર્ણય લેવામાં આવશે. તેમણે 12 ડિસેમ્બરે કાર્યકારોને જયપુર આવવા આહવાન કરતા કહ્યું કે, કેન્દ્રના અત્યાચાર વિરોધી રેલી છે.  

કોંગ્રેસ નેતા અર્જુન મોઢવાડિયાએ  ભાજપ પર પ્રહાર કરતા કહ્યું કે, 27 વર્ષનો અહંકાર આપણે તોડવાનો છે.કોરોનામાં વાઇબ્રન્ટ ગુજરાત નહીં કરવા દઈએ. મોઢવાડીયાએ હુંકાર કરતા ઉમેર્યું કે 
ભ્રષ્ટાચારી અધિકારીઓ બીસ્ત્રા ભરી રાખો, હવે કોંગ્રેસ માટે ગાંધીનગર દૂર નથી.  ખેડૂત આંદોલને કેન્દ્ર સરકારનો અહંકાર તોડી નાખ્યો છે. તો કોન્ગ્રેસના પૂર્વ પ્રમુખ ભરતસિંહ સોલંકીએ કહ્યું કે, 
થોડા સમયમાં કાર્યકારી પ્રમુખોની નિમણુંકો થશે. આજે સમાજમાં કોઈ પણ માણસ સલામત નથી.તેમણે એવું પણ કહ્યું કે, વાયબ્રન્ટ ગુજરાત માત્ર તાયફાઓ છે. ખોડલધામ મંદિર મુલાકાતનો ભરતસિંહ સોલંકીએ ઉલ્લેખ કરતા કહ્યું કે, મંદિર મુલાકાત બાદ મને વાઈબ્રેશન આવ્યા છે. સોલંકીએ, તમામ સમાજને ભેગા લઈ આગળની લડત લડવાની છે તેમ પણ ઉમેર્યું હતું.

ઠાકોરની 'કેક'વખતે જ જાગ્યો દુર્ભાવ; નેતાઓ  રવાના 

ગુજરાત પ્રદેશ કોંગ્રેસ કાર્યાલયે નવનિર્વાચિત જગદીશ ઠાકોરના પદ ગ્રહણ સમારોહ બાદ કેક કાપવાની એક રસમ અદા કરવાની હતી. પણ પાર્ટીની એકતા અને ભાજપની નીતિ-રીતિને 'સુંડલા મોઢે' સંભળાવતા નેતાઓને ઠાકોરની 'કેક' પ્રત્યે દુર્ભાવ  ઉપજ્યો હોય તેમ વરિષ્ઠ નેતાઓએ ચાલતી પકડી હતી. હજુ હમણા સુધી તો 'કુંડલીની જાગ્રત' કરવાની જેમ કોન્ગ્રેસ માટે કામ કરવાનું કહી રહેલા નેતાઓ કેકનો સ્વાદ લેવા પણ ઉભા નાં રહેતા તર્ક-વિતર્ક શરુ થયા છે. 

જગદીશ ઠાકોરના પદ ગ્રહણ બાદ, ઠાકોર,ધાનાણી આગળ વધ્યાં.કાર્યકારી પ્રમુખ હાર્દિકને આવતા પાંચેક મિનીટ જેટલો સમય લાગ્યો ,તોઈ ઠાકોરે રાહ જોવાનું મુનાસીબ માન્યું હતું. આ તરફ, કેક જ્યારે કપાય ત્યારે એવું વિચારી, ભરતસિંહ,સિદ્ધાર્થ  પટેલ અને અર્જૂન મોઢવાડીયા સરકી ગયા હતા. આ નિહાળી રહેલા કોંગ્રેસીઓને એ સમજતા વાર ના લાગી કે, અહીં મહોરા પાછળના ચહેરા છે', કેટલોક ગણગણાટ એવો પણ થયો કે, 'બધું બરોબર તો નથી જ'.