ગજબ થયું / કારમાં બેઠા હતા મુખ્યમંત્રીના બહેન, અને ઉઠાવીને લઈ ગઈ પોલીસ...જાણો શું છે ચોંકાવનારો મામલો

• તેલંગાણામાં સરકાર વિરુધ વિરોધ પ્રદર્શન
• શર્મિલા રેડ્ડીને કાર સાથે કસ્ટડીમાં લઇ ગયા
• ટીઆરએસના કાર્યકરોના હુમલા વિરુધ્ધ પ્રદર્શન કર્યું હતું

તેલંગાણામાં સરકાર વિરુદ્ધ વિરોધ પ્રદર્શન દરમિયાન એક અલગ જ દ્રશ્ય જોવા મળ્યું હતું. વિરોધ પક્ષના નેતા શર્મિલા રેડ્ડીને પોલીસ વાહન સાથે વિરોધ સ્થળ પરથી દૂર લઈ જવામાં આવ્યા હતા. શર્મિલા રેડ્ડી પોતે તે સમયે કારની અંદર હતી.પોલીસ તેમને કસ્ટડીમાં લેવા માંગતી હતી, પરંતુ ડ્રાઇવિંગ સીટ પર બેઠેલી શર્મિલાએ નીચે ઉતરવાની ના પાડી. આના પર તેલંગાણા પોલીસ તેને કાર સાથે લઈ ગઈ હતી. વાહન ઉપાડવાનો વીડિયો સોશિયલ મીડિયા પર વાયરલ થઈ રહ્યો છે. શર્મિલા રેડ્ડી આંધ્રપ્રદેશના સીએમ જગન મોહન રેડ્ડીની બહેન છે. તે તેલંગાણામાં YSR તેલંગાણા પાર્ટીના પ્રમુખ છે. શર્મિલા રેડ્ડી મંગળવારે બપોરે સીએમ કેસીઆરના આવાસની બહાર વિરોધ પ્રદર્શન કરવા જઈ રહી હતી. તેમની સાથે મોટી સંખ્યામાં સમર્થકો પણ હાજર હતા.

કાર સાથે શર્મિલાને પણ લઇ જવામાં આવી
સોમવારે વારંગલમાં તેમના વાહન પર હુમલો કરવામાં આવ્યો હતો, જેમાં ટીઆરએસના કાર્યકરો દ્વારા હુમલો કરવામાં આવ્યો હોવાનો આરોપ છે. તેના વિરોધમાં તે બહાર આવી હતી. પોલીસે શર્મિલા અને તેના 6 સમર્થકોની ધરપકડ કરી હતી અને પછી તેમને સ્થાનિક મેજિસ્ટ્રેટ સમક્ષ રજૂ કરીને ન્યાયિક રિમાન્ડની માંગણી કરી હતી. આ દરમિયાન શર્મિલાની માતા વિજયમ્મા તેને મળવા માંગતી હતી, પરંતુ પોલીસે તેને નજરકેદ કરી હતી. આ આખું ડ્રામા બપોરે 12 વાગ્યાની આસપાસ શરૂ થયું, જ્યારે શર્મિલા કેસીઆરના નિવાસસ્થાને પ્રદર્શન માટે ઘરેથી નીકળી. રાજભવન રોડ પર પહોંચતા જ તે કારની પાછળની સીટ પરથી આગળ આવી અને પોતે ડ્રાઇવિંગ કરવા લાગી. 

કારમાં બેસીને જ આપ્યું નિવેદન
આ દરમિયાન પોલીસ તેમને રોકવા પહોંચી અને કારમાંથી બહાર નીકળવા કહ્યું.જ્યારે શર્મિલાએ ના પાડી, ત્યારે તેઓએ તેની કાર ખેંચી અને તેને લઈ ગયા, જ્યારે તે હજી ડ્રાઇવિંગ સીટ પર બેઠી હતી. આ દરમિયાન તે ટીવી ચેનલોને ફોન પર ઈન્ટરવ્યુ પણ આપતી હતી. તેમણે કહ્યું કે અમે સરકારની નિષ્ફળતાને ઉજાગર કરી રહ્યા હતા અને તે દરમિયાન કેસીઆરના ગુંડાઓએ અમારા પર હુમલો કર્યો. અમે મુખ્યમંત્રીને બતાવવા જઈ રહ્યા હતા કે કેવી રીતે અમારા વાહનની તોડફોડ કરવામાં આવી અને લોકશાહી સમાજમાં આવું ન થઈ શકે.