ચોમાસું / ગુજરાતના આ વિસ્તારોમાં આજે વરસાદ તૂટી પડશે, જાણો હવામાન વિભાગે શું કરી મોટી આગાહી

• રાજ્યમાં આજે બનાસકાંઠા અને સાબરકાંઠામાં વરસાદ વરસશે
• દક્ષિણ ગુજરાતમાં સુરત, ડાંગ, અને નવસારીમાં વરસાદની આગાહી
• અમદાવાદ, ગાંધીનગર, મહેસાણા અને વડોદરામાં પણ વરસાદ વરસશે

રાજ્ય (ગુજરાત) માં હવે ચોમાસાનું આગમન થઇ ગયું છે. ત્યારે આજ રોજ ફરી હવામાન વિભાગે આગાહી કરતા જણાવ્યું છે કે, 'આજે રાજ્યમાં ઉત્તર ગુજરાતની વાત કરીએ તો ઉ. ગુજરાતમાં બનાસકાંઠા અને સાબરકાંઠામાં આજે વરસાદ વરસશે. એ સિવાય દક્ષિણ ગુજરાતમાં સુરત, ડાંગ, તાપી અને નવસારીમાં પણ વરસાદની આગાહી કરવામાં આવી છે. તો મધ્ય ગુજરાતમાં અમદાવાદ, ગાંધીનગર, મહેસાણા, આણંદ અને વડોદરામાં પણ વરસાદની આગાહી કરાઇ છે.

અત્યાર સુધીમાં રાજ્યના 109 તાલુકામાં વરસાદ વરસ્યો

મહત્વનું છે કે, રાજ્યમાં હવે ચોમાસાની વિધિવત એન્ટ્રી થઇ ચૂકી છે અને અત્યાર સુધીમાં રાજ્યના 109 તાલુકામાં વરસાદ વરસ્યો છે ત્યારે હવામાન વિભાગે આજ રોજ ફરી રાજ્યના કેટલાંક વિસ્તારોમાં વરસાદ વરસશે તેવી આગાહી કરી છે.

રાજ્યમાં છેલ્લાં 24 કલાકમાં 22 તાલુકામાં વરસાદ વરસ્યો

તમને જણાવી દઇએ કે, રાજ્યમાં છેલ્લાં 24 કલાકમાં 22 તાલુકામાં વરસાદ વરસ્યો છે. જેમાં સૌથી વધારે ખંભાળિયામાં પોણા 3 ઈંચ વરસાદ ખાબક્યો છે. જ્યારે કાલાવડમાં 2.5 ઈંચ, મુળીમાં 1 ઈંચ વરસાદ, પડધરીમાં 1 ઈંચ, રાજકોટમાં 1 ઈંચ વરસાદ, સાયલામાં અડધો ઈંચ અને ધંધુકામાં અડધો ઈંચ વરસાદ વરસ્યો છે.

રાજકોટમાં ગઇકાલે અડધો કલાકમાં જ 2 ઈંચ વરસાદ ખાબક્યો હતો

અત્રે ઉલ્લેખનીય છે કે, રાજકોટમાં ગઇકાલે સાંજ બાદ વાતાવરણ પલટાયું હતું. જેમાં માત્ર અડધો કલાકમાં જ 2 ઈંચ વરસાદ ખાબક્યો હતો. જેમાં કાલાવડ રોડ, મવડી રોડ, 150 ફૂટ રીંગ રોડ પર પાણી ભરાઇ ગયા હતાં. તદુપરાંત મહિલા કોલેજ અન્ડરબ્રિજ, કિસાનપરા ચોક, કાલાવડ રોડ, ગોંડલ રોડ પર પાણી જમા થતાં તંત્રની પ્રિ મોન્સુન કામગીરી ધોવાઈ ગઈ હતી. સાથે જ રાજકોટના ગ્રામ્ય વિસ્તારમાં પણ પહેલો વરસાદ વાવણી લાયક પડતાં ભારે ખુશી જોવા મળી હતી. તો રાજકોટ વાસીઓને ભારે બફારામાંથી મુક્તિ મળી હતી. શહેરના અનેક વિસ્તારમાં પાણી દોઢ ફૂટ જેટલા પાણી ભરાઈ ગયા હતા.

પ્રિ-મોન્સૂનની નબળી કામગીરી દર વર્ષની જેમ ખુલ્લી પડી

રાજકોટમાં ચોમાસાનો પ્રથમ વરસાદ વરસ્યો હતો. જેમાં મનપાની પ્રિ-મોન્સૂન કામગીરીના દાવા પોકડ સાબિત થયા છે. શહેરમાં આવેલા 2 ઈંચ જેટલા વરસાદમાં જ વેસ્ટઝોનમાં રસ્તાઓ પર પાણી ભરાયા છે. વેસ્ટઝોનના અન્ડરબ્રિજ અને વોકળામાં પ્રથમ વરસાજમાં જ પાણી ભરાયા. જેથી શહેરીજનોને મુશ્કેલી સહન કરવાનો વારો આવ્યો.

એક વરસાદી સિસ્ટમ ગુજરાતમાં સક્રિય

રાજ્યમાં ચોમાસાના પ્રારંભ બાદ મેઘમહેર જોવા મળી રહી છે.આગામી દિવસોમાં ચોમાસું સમગ્ર રાજ્યમાં પહોંચશે તેવી આગાહી હવામાન વિભાગ દ્વારા કરવામાં આવી છે.સૌરાષ્ટ્રમાં 2 દિવસ વરસાદની આગાહી કરવામાં આવી છે.હાલ એક વરસાદી સિસ્ટમ રાજ્યમાં સક્રિય છે. 16 અને 17 તારીખે વરસાદની આગાહી કરાઇ છે.અમદાવાદમાં પણ રહેશે વાદળછાયુ વાતાવરણ જોવા મળશે. અમદાવાદમાં ઠંડરસ્ટોર્મ એક્ટિવિટી જોવા મળશે. રાહતની વાત એ છે કે નિયત સમય મુજબ ગુજરાતમાં વરસાદની પધરામણી થઈ ચૂકી છે. જો આગાહી મુજબ ગુજરાતમાં સારો વરસાદ વરસે તો પ્રથમ વરસાદે જ ખેડૂતો વાવણી કરી શકશે.