એલન મસ્કનું સપનું મંગળ પર લોકોને મોકલવાનું છે. એ સપનું ક્યારે સાકાર થશે તે સ્પષ્ટ નથી. પરંતુ તે પહેલા લોકો એક નવી જ દુનિયામાં પ્રવેશ કરી લેશે અને તે દુનિયાનું નામ છે મેટાવર્સ. મેટાવર્સ એક એવી દુનિયા છે જે અસલી નથી, પરંતુ આ આભાસી દુનિયામાં પણ તમે જમીન ખરીદીને પોતાનું ઘર બનાવી શકશો, બિઝનેસ કરી શકશો, પૈસા કમાઈ શકશો. તમે ત્યાં બધું જ કરી શકશો તે તમે અસલી દુનિયામાં કરી શકશો.
મેટાવર્સની નવી દુનિયાનું કેવું છે વી ફેક્ટર ?
મેટાવર્સ એક એવી દુનિયા છે જે અસલી નથી
આભાસી દુનિયામાં તમે બિઝનેસ કરી શકશો
આપણે પૌરાણિક કથાઓમાં ઘણું સાંભળ્યું છે
ચાંદ અને તારાઓની પેલે પાર પણ એક દુનિયા છે. આપણે એ દુનિયા વિશે પૌરાણિક કથાઓમાં ઘણું સાંભળ્યું છે. ઘણી ફિલ્મોમાં પણ એ દુનિયાને જોઈ છે. જેમાં દેવી, દેવતાઓ, યક્ષ, ગાંધર્વો અને કિન્નરો ક્ષણ વારમાં મૃત્યુલોકથી દેવ લોકોમાં અને દેવલોકથી સ્વર્ગલોકમાં જઈ શકતા હતા. ઠીક આવી જ એક દુનિયા હવે મેટાવર્સ સ્વરૂપે આપણને તેનામાં સમાવી લેવા તૈયાર થઈ રહી છે. મેટાવર્સ ટેકનોલોજીમાં જે રીતે પ્રગતિ થઈ રહી છે તે જોતાં એ કહેવામાં અતિશયોક્તિ નથી આગામી 10થી 15 વર્ષમાં આપણે કોઈ નવી જ દુનિયા શિફ્ટ થઈ ચૂક્યા હોઈશું.
મેટાવર્સ હકીકતમાં એક એવી આભાસી દુનિયા
હાલ આભાસી ચલણ તરીકે દુનિયામાં ક્રિપ્ટોકરન્સીની બોલબાલા છે. પરંતુ આગામી કેટલાક વર્ષોમાં મેટાવર્સ શબ્દ ટ્રેન્ડ કરતો હશે. મેટાવર્સ હકીકતમાં એક એવી આભાસી દુનિયા છે. જેમાં આપણે તે બધું જ કરી શકીશું જે હાલ આપણે હકીકતની દુનિયામાં કરી રહ્યા છીએ. વર્તમાન દુનિયામાં આપણી હાજરી છતા આપણે મેટાવર્સની દુનિયાના કોઈ પણ વિસ્તારમાં ઉપસ્થિત રહી શકીશું. વર્તમાન દુનિયામાં રહેવા માટે જેમ જમીન અને મકાનની જરૂર પડે છે, તેમ મેટાવર્સની દુનિયામાં રહેવા માટે આપણે પ્લોટ ખરીદી શકીશું અને તેના પર મકાન પણ બાંધી શકીશું. જેની શરૂઆત થઈ ગઈ છે. લોકો દુકાન ખોલવા માટે અને કોન્સર્ટ આયોજિત કરવા માટે પ્લોટ ખરીદી રહ્યા છે. જો કે આ આભાસી દુનિયામાં પ્લોટ અને દુકાન ખરીદવા માટે નાણા તો અસલી જ ચૂકવવા પડે છે. તેમ છતાં મેટાવર્સની દુનિયામાં જમીન ખરીદીના નવા રેકોર્ડ સ્થપાઈ રહ્યા છે. જેના પર એક નજર કરીએ તો અમેરિકાની વીડિયો ગેમ કંપનીના ડેલવપર રિપબ્લીક રિઅલ્મે 32 કરોડ રૂપિયામાં જમીન ખરીદી છે, હોંગકોંગના અબજપતિએ મેટાવર્સમાં વિશાળ પ્લોટ ખરીદ્યો છે, તે મેટાવર્સ પર GPA પેલેવિયન બનાવવા માગે છે. આ પહેલા ટોકેન્સ ડોટ કોમ કંપનીએ મેટાવર્સમાં 2.43 મિલિયન ડોલરમાં પ્લોટ કરીદ્યો હતો, ન્યૂયોર્કની રિયલ એસ્ટેટ કંપની પોપ્યુલર મેટાવર્સ પ્લેટફોર્મ સૈંડબોક્સ મેટાવર્સ પર જમીન વેચી રહી છે.
મેટાવર્સમાં લોકો આભાસી પ્લોટ કેમ ખરીદી રહ્યાં હશે?
આપને સવાલ થતો હશે કે, લોકો કરોડો રૂપિયા આપીને મેટાવર્સમાં આભાસી પ્લોટ કેમ ખરીદી રહ્યા હશે. તો આપને જણાવી દઈએ કે, ફેસબુક અને માઈક્રોસોફ્ટ સહિત દુનિયાની અનેક દિગ્ગજ કંપનીઓ મેટાવર્સની દુનિયાને વિકસિત કરવા માટે અબજો રૂપિયાનું રોકાણ કરી રહ્યા છે ત્યારે એ દુનિયામાં હિસ્સો બનીને મધ્યમક્ષમતા વાળા લોકો પણ રોકાણ કરીને ભવિષ્યમાં કમાણી કરવાનું પ્લેટફોર્મ તૈયાર કરી રહ્યા છે.
1992માં સ્ટીવન સ્ટીફેંસને નોવેલમાં `મેટાવર્સ' ટર્મનો ઉપયોગ કર્યો
સૌપ્રથમ 1992માં સ્ટીવન સ્ટીફેંસને પોતાની સ્નો ક્રેશ નામની સાઈંસ ફિક્શન નોવેલમાં `મેટાવર્સ' ટર્મનો ઉપયોગ કર્યો હતો. તેમણે કલ્પના કરી હતી કે, મેટાવર્સ એક એવી સ્પેસ હશે જ્યાં લોકો પોતાના આભાસી અવતાર દ્વારા એક બીજા સાથે સમય વિતાવી શકશે અને સામાજિક, આર્થિક વ્યવહારો પણ કરી શકશે. આ કલ્પના હવે વાસ્તવિકતામાં બદલાઈ ગઈ છે. હવે લોકો મેટાવર્સ પર વર્ચ્યુઅલ જમીન ખરીદવા અબજો રૂપિયા ખર્ચી રહ્યા છે. મેટાવર્સ માટે અલગ-અલગ ટેકનોલોજીનો ઉપયોગ કરવામાં આવશે. જેમાં ઓગ્મેન્ટેડ રિયાલિટી, વર્ચુઅલ રિયાલિટી અને વીડિયો ટૂલ. આ ટેકનોલોજી દ્વારા લોકો આભાસી દુનિયામાં ડિજિટલી સાથે રહેતા હશે. અહીં તમે રમતગમતમાં પણ હિસ્સો લઈ શકશો, અને લોકો સાથે મીટિંગ પણ કરી શકશો, શોપિંગ પણ કરી શકશો અને માલ પણ વેચી શકશો. સરળ શબ્દોમાં કહીએ તો એક એવી દુનિયા જ્યાં તમારી અલગ ઓળખ હશે. તમે ઘરે જ હશો પરંતુ તમારો બીજો અવતાર મેટાવર્સમાં હશે અને જેના પર ઘરે બેઠા જ તમારો કંટ્રોલ હશે.
મેટાવર્સ સોશિયલ મીડિયા માટે નવી ક્રાંતિ
અહી તમારી ઉપસ્થિતિ વીડિયો ફોર્મેટથી ઘણી જુદી હશે. મેટાવર્સ સાથે કનેક્ટ કરતી ડિવાઈસની મદદથી તમે એ સાક્ષાત અનુભવી શકશો કે તમે આભાસી દુનિયામાં અનેક લોકો સાથે એન્જોય કરી રહ્યા છો. જેમ સોશિયલ મીડિયા સ્પેસમાં એક રીતે ફેસબુકની મોનોપોલી છે ઠીક એવી જ રીતે માર્ક જકરબર્ગ મેટાવર્સને પણ મોનોપોલી બનાવવાની કવાયત કરી રહ્યા છે. મેટાવર્સ સોસિયલ મીડિયા માટે નવી ક્રાંતિ છે અને કમાણીનું નવું પ્લેટફોર્મ છે. આથી જ આ મેટાવર્સની દુનિયામાં અનેક કંપનીઓ અબજો ડોલર રૂપિયાનું રોકાણ કરવા થનગની રહી છે.