વડોદરામાં બેંકર્સ હાર્ટ ઇન્સ્ટિટ્યૂટ પર વહેલી સવારથી જ IT વિભાગના દરોડા, નાણાકીય વહીવટોની ઝીણવટ ભરી થઇ રહી છે તપાસ
વડોદરાની બેંકર્સ હાર્ટ ઇન્સ્ટિટ્યૂટ પર ITના દરોડા
ઓ.પી રોડ પર આવેલી બેંકર્સ હાર્ટ હોસ્પિટલમાં તપાસ
IT વિભાગ હોસ્પિટલ, ઑફિસ અને નિવાસસ્થાન પર તપાસ
વડોદરામાં આઇટી વિભાગે સર્ચ ઓપરેશન શરૂ કર્યુ છે. વડોદરાની બેંકર્સ હાર્ટ ઇન્સ્ટિટ્યુટ પર આઇટી વિભાગ દ્વારા દરોડા પાડવામાં આવ્યા છે. વડોદરાના ઓપી રોડ પર આવેલી બેંકર્સ હોસ્પિટલ તેમજ સુરત ખાતે આવેલી હોસ્પિટલના નાણાકીય વહીવટોની બેંક દ્વારા તપાસ કરવામાં આવી રહી છે.
ઈન્કમ ટેક્સ વિભાગની ત્રણ ટીમ દ્વારા તપાસ
બેંકર્સ ગ્રુપની ઓફિસ, હોસ્પિટલ સહિતના માલિકોના ઘર પર પણ આઈટીની ટીમ ત્રાટકી છે. જમીનો અને સોનામાં રોકાણ કર્યું હોવાની પણ તપાસ કરવામાં આવી રહી છે. વહેલી સવારથી જ આઇટી વિભાગની ટીમ દ્વારા તપાસ કરવામાં આવી રહી છે. તપાસમાં મોટાપાયે ગેરરીતી એટેલે કે મોટી કરચોરી બહાર આવે તેવી શક્યતા છે. હાલ આઇટી વિભાગની 3 ટીમો દ્વારા સઘન તપાસ શરૂ કરવામાં આવી છે.
સુરતમાં બેંકર્સ હોસ્પિટલ ખાતે રેડ
સુરતમાં પણ બેંકર્સ હોસ્પિટલ ખાતે પણ આઇટીએ સર્ચ ઓપરેશન શરૂ કર્યુ છે. પીપલોદ વિસ્તારમાં આવેલી હોસ્પિટલમાં ટીમ તપાસમાં જોડાઇ છે. એનજીઓના સહકારથી તેમના જ કેમ્પસમાં આ હોસ્પિટલ ચાલી રહી છે આ અંગે પણ આવકવેરા વિભાગે તપાસ શરૂ કરી છે.
મોટી કરચોરી બહાર આવે તેવી શક્યતા
હાલ બેંકર્સ ગ્રુપની ઓફિસ અને હોસ્પિટલ તથા નિવાસ સ્થાને તપાસની કામગીરી આઈટી દ્વારા હાથ ધરાઈ છે. લગભગ 50 જેટલા અધિકારીની ટીમ તપાસમાં જોડાઈ હોવાનું સામે આવી રહ્યું છે. કોરોના બાદ જમીન અને સોનાની ખરીદી કરવાના પગલે આ તપાસ થઈ રહી હોવાનું ચર્ચાઈ રહ્યું છે. વાઘોડિયા રોડની હોસ્પિટલની લોનના 18 કરોડ કોરોનામાં ભરપાઇ કર્યા હતા તે અંગે પણ વિગતવાર તપાસ કરવામાં આવી રહી છે. હાલ આઈટી દ્વારા કોમ્પ્યુટર, હાર્ડ ડિસ્ક અને નાણાકિય વહિવટના દસ્તાવેજોની ઝીણવટભરી તપાસ થઈ રહી છે.