અમદાવાદમાં આવેલી દિશમાન ફાર્મા કંપનીમાં ITના અધિકારીઓએ દરોડા પાડ્યા. દિશમાન ફાર્મા કંપનીમાં સતત બીજા દિવસે પણ તપાસ ચાલુ રાખી છે. અધિકારીઓએ 12 રહેણાક અને 7 કંપનીમાં તપાસ હાથધરી હતી. દિશમાન કંપનીની વિદેશમાં ઓફિસ, મેન્યુફેક્ચરિંગ પ્લાંટ હોવાનું સામે આવ્યુ છે.
ITના અધિકારીઓને દરોડામાં 26 લાખ રોકડા મળ્યા હતા. ઈન્કમટેક્સ વિભાગને 17 બેંકના લોકરની માહિતી પણ મળી આવી હતી. ITના અધિકારીઓને જમીન ખરીદીના અને બોગસ વ્યવહારના પુરાવા હાથે લાગ્યા છે. ITના અધિકારીઓને તપાસ દરમિયાન સર્વર, લેપટોપ, મોબાઈલ મળી આવતા તપાસ માટે FSLની મદદ લેવામાં આવી છે.
ઉલ્લેખનીય છે કે ફાર્મા સેકટરમાં મોટું નામ ધરાવતી દિશમાન ફાર્માસ્યુટિકલ કંપની પર ગઇકાલે સવારથી આવકવેરા વિભાગે દરોડાની કાર્યવાહી શરૂ કરી હતી. બોપલ અને થલતેજ રોડ પર આવેલી આ ફાર્મા કંપનીની ઓફિસમાં ગઇકાલે રાબેતા મુજબના સમયે શરૂ થાય તે પહેલાં જ આવકવેરા વિભાગના અધિકારીઓ ત્યાં પહોંચી ગયા હતા. ૧ર જેટલા અધિકારીઓએ કંપનીની ઓફિસમાં દસ્તાવેજોની ચકાસણીની કામગીરી હાથ ધરી હતી.
કંપનીની બાવળા પાસે સાણંદ રોડ ઉપર આવેલી ફેક્ટરી અને નરોડાની ફેક્ટરી પર પણ આવકવેરા વિભાગની ટીમે તપાસ હાથ ધરી હતી. જેમાં કંપનીની ઓફિસ અને ફેક્ટરી સહિત હવે તપાસનો રેલો માલિકોના રહેઠાણ સુધી પહોંચ્યો હતો.