મહાસંમેલન / દીકરી પ્રેમ લગ્ન કરે તો મંજૂરી જરૂરી, મિલકતમાંથી નામ કમી: પાટીદાર સમાજની માંગને રાજપૂત, પ્રજાપતિ સહિતના સમાજનો ટેકો

• મહેસાણા 84 કડવા પાટીદાર સંકુલ ખાતે સંમેલન
• દીકરીઓના પ્રેમ લગ્ન બાબતે કરવામાં આવી ચર્ચા 
• માતા-પિતાની સહી ફરજિયાત કરવા માંગ

રાજ્યમાં છેલ્લા ઘણા સમયથી કડવા પાટીદાર સમાજ દ્વારા દિકરીના પ્રેમલગ્ન કરવા અંગે માતા પિતાની સહી લેવી ફરજિયાત કરવા પર ચર્ચાઓ કરવામાં આવી રહી છે. આ અંગે છેલ્લા ઘણા મહિનાથી બેઠકોનો દોર શરૂ થયો છે. ત્યારે આજે કડવા પાટીદાર સમાજનું મહાસંમેલન યોજાયુ છે જેમાં મોટી સંખ્યામાં પાટીદાર આગેવાનો તથા સમાજના લોકો હાજર રહ્યા છે. 

મહેસાણા 84 કડવા પાટીદાર સંકુલ ખાતે સંમેલન

મહેસાણા 84 કડવા પાટીદાર સંકુલ ખાતે મહાસંમેલનનું આયોજન કરવામાં આવ્યું છે.  જેમાં પુખ્તવયની દિકરી જો પ્રેમલગ્ન કરે તો માતાપિતાની સહી ફરજિયાત લેવાની માગ કરવામાં આવી છે. દીકરી 25 વર્ષે પ્રેમ લગ્ન કરે તો મિલકતમાંથી નામ આપોઆપ કમી થાય તેવો કાયદો લાવવા માંગ કરી છે.  ચોર્યાસી પાટીદાર સમાજની આ માંગને અન્ય સમાજ દ્વારા પણ આવકારવામાં આવી. સૌરાષ્ટ્ર રાજપૂત સમાજ, ચરોતર બ્રહ્મ સમાજ તથા પ્રજાપતિ સમાજ અને નાયી સમાજ દ્વારા ટેકો જાહેર કરાયો છે.

એસપીજી દ્વારા પણ કરવામાં આવી માંગ 

ઉલ્લેખનીય છે કે 22 ઑગષ્ટે મહેસાણામાં ઉત્તર ગુજરાતના કડવા પાટીદારોની  પ્રેમ લગ્ન કરવા મુદ્દે મહત્વની બેઠક મળી હતી. આ બેઠકમાં દિકરીઓ દ્વારા પ્રેમ લગ્ન કરવા બાબતે ચર્ચા કરવામાં આવી હતી. તમામ સમાજ પાસેથી આ બાબતે ઠરાવ મંગાવવામાં આવ્યા હતા. અગાઉ પણ મહેસાણામાં ચોરાસી કડવા પાટીદાર સમાજ સંકુલ ખાતે  પ્રમુખ જશુભાઇ પટેલના અધ્યક્ષ સ્થાને સમાજની કારોબારી સભા મળી હતી. જેમાં માતા પિતાની સંમતિ વિના લગ્ન કરીને ભાગી જતી દિકરીઓ માટે કાયદો બનાવવો. જો માતા પિતા સહીની સંમતિ ન આપે તો મિલકતમાંથી નામ નીકળી જાય તેવો કાયદો બનાવવા અંગે સરકારને રજૂઆત કરવાનો નિર્ણય લેવામાં આવ્યો હતો. આ પ્રકારની માગ અગાઉ SPG દ્વારા પણ કરવામાં આવી હતી. તેઓએ પણ લગ્ન નોંધણીમાં માતા-પિતાની સહી ફરજિયાત કરવા માંગ કરી હતી.