સારા સમાચાર / મહામારીમાં ધંધાઓમાં મોટાપાયે છટણી વચ્ચે ગુજરાતમાં 4 મહિનામાં આ ઉદ્યોગમાં 25,000 નવી નોકરીઓની થશે ભરતી!

• ગુજરાતનો IT ઉદ્યોગ નવી વૃદ્ધિ માટે સજ્જ
• અમેરિકા ફરી વખત આઉટસોર્સિંગને વેગ આપશે
• ગુજરાતે છેલ્લાં કેટલાક વર્ષોમાં આ ઉદ્યોગમાં નોંધપાત્ર પ્રગતિ કરી

ગુજરાતનો IT ઉદ્યોગ નવી વૃદ્ધિ માટે સજ્જ છે અને આગામી ચાર મહિનામાં આ ઉદ્યોગમાં 25,000થી વધારે નવી નોકરીઓના સર્જનની શક્યતા છે. અમેરિકામાં પ્રમુખપદની ચૂંટણીમાં ડેમોક્રેટિક પાર્ટીના વિજયના કારણે આઇટી ઉદ્યોગ માને છે કે અમેરિકા ફરી વખત આઉટસોર્સિંગને વેગ આપશે.

ગુજરાત ઇલેક્ટ્રોનિક્સ એન્ડ સોફ્ટવેર ઇન્ડસ્ટ્રીઝ એસો.ના અંદાજ મુજબ ગુજરાતના આઇટી ઉદ્યોગમાં આગામી મહિનાઓમાં આક્રમક ભરતી જોવા મળી શકે છે. કોરોના મહામારી દરમિયાન આઇટી ઉદ્યોગે કર્મચારીઓ માટે વર્ક ફ્રોમ હોમ કોન્સેપ્ટ અપનાવ્યો હતો અને સતત નવા ઓર્ડર્સ પણ મેળવ્યાં હતા.

IT ઉદ્યોગની બસ ચૂકી ગયેલા ગુજરાતે છેલ્લાં કેટલાક વર્ષોમાં આ ઉદ્યોગમાં નોંધપાત્ર પ્રગતિ કરી છે અને રાજ્યમાં IT એજ્યુકેશન પણ વિકસ્યું છે. તેથી અહીં સ્થાનિક મેનપાવર પણ મળી રહે છે. આગામી મહિનાઓમાં સોફ્ટવેર પ્રોફેશનલ્સ ઉપરાંત ગુજરાતના IT ઉદ્યોગ દ્વારા નવા માર્કેટ્સની શોધ માટે માર્કેટિંગ માટે પણ મોટા પ્રમાણમાં ભરતી થશે.