ગલવાન સીમા પર ભારત અને ચીનની જવાનો વચ્ચે થયેલી હિંસક અથડામણ બાદ ભારત અને ચીન વચ્ચે ગંભીર સ્થિતિ જોવા મળી રહી છે ત્યારે ઈન્કમટેક્સ વિભાગે આજે કેટલાંક ચીની નાગરિકો અને તેમના ભારતીય એસોસિયેટ્સ પર તવાઇ બોલાવતા 1 હજાર કરોડથી વધુના હવાલા કૌભાંડ ઝડપી પાડ્યું છે. નોંધનીય છે જેમાં 40થી વધુ ફેક એકાઉન્ટ હોવાનું પણ ખુલ્યું છે.
ઈન્કમટેક્સ વિભાગનો સપાટો
કેટલાંક ચીની નાગરિકો અને તેમના ભારતીય એસોસિયેટ્સ દરોડા
1000 કરોડથી પણ વધુનું કૌભાંડ ઝડપી પાડ્યું
વિશ્વાસુ સૂત્રો દ્વારા મળેલી માહિતીની આધારે કેટલાંક ચીની નાગરિકો અને તેમના ભારતીય એસોસિયેટ્સ પર ઈન્કમટેક્સ વિભાગે દરોડા પાડ્યા હતાં. જેમાં 1000 કરોડથી પણ વધુનું મની લોન્ડરિંગ અને હવાલા કૌભાંડ સામે આવ્યું હતું.
ઈન્કમટેક્સ વિભાગે બાતમીના આધારે પાડ્યા દરોડા
ઈન્કમટેક્સ વિભાગે કહ્યું હતું કે પાક્કી બાતમીની આધારે દરોડા પાડ્યાં હતાં આ મની લોન્ડરિંગ અને હવાલા કૌભાંડમાં કેટલીક ખોટી કંપનીઓ બનાવીને ટ્રાન્ઝેક્શન્સ કરવાનું માલૂમ પડ્યું હતું. કેટલીક ચાઈનીઝ કંપનીઓની ઓફિસો, તેમના કેટલાંક વિશ્વાસુ વ્યક્તિઓ અને બેંક કર્મચારીઓને ત્યાં દરોડા પાડ્યા બાદ તપાસમાં આ કૌભાંડ ખૂલ્યું હોવાનું આવકવેરા વિભાગે જણાવ્યું હતું.
40થી વધુ બેન્ક અકાઉન્ટ નકલી હોવાનું આવ્યું સામે
આવકવેરા વિભાગના જણાવ્યા અનુસાર તપાસમાં 40થી વધુ બેન્ક અકાઉન્ટ નકલી કંપનીઓના નામે બનાવવામાં આવ્યાં હતાં. જેમાં 1000 કરોડ રૂપિયાના ટ્રાન્ઝેક્શન થયા હોવાનું બહાર આવ્યું હતું. ચાઈનીઝ કંપનીની સબસીડરીકંપની અને તેના સંબંધિત લોકોએ ભારતમાં રિટેલ શોરૂમના બિઝનેસ માટે બનાવટી કંપનીઓમાંથી 100 કરોડ રૂપિયા એડવાન્સ રૂપે લીધાં હતા.
મની લોન્ડરિંગ સંડોવણીના દસ્તાવેજો પણ મળી આવ્યા
આ ઉપરાંત IT ડિપાર્ટમેન્ટને હવાલા ટ્રાન્ઝેક્શન્સ અને મની લોન્ડરિંગ સંડોવણીના પણ કેટલાંક દસ્તાવેજો હાથ લાગ્યાં હતાં. જેમાં કેટલાંક બેંક કર્મીઓ અને CAની સંડોવણી પણ સામે આવી છે. વિદેશમાં હવાલા ટ્રાન્ઝેક્શન્સની સાબિતીરૂપે હોંગકોંગ અને અમેરિકી ડોલર પણ તપાસ દરમ્યાન જપ્ત કરાયા હતા. આ મામલે આવકવેરા વિભાગની વધુ તપાસ હાલ ચાલુ છે તેમ જણાવાવમાં આવ્યું છે.