ઇસરો ગગનયાનના અંતિમ મિશન પહેલાં ડિસેમ્બર-ર૦ર૦ અને જુલાઇ-ર૦ર૧માં અંતરિક્ષમાં માણસ જેવા રોબોટ મોકલશે જેને હ્યુમેનોઇડ કહેવાય છે. અન્ય દેશ આવા મિશન પહેલાં અંતરિક્ષમાં પશુઓને મોકલી ચૂક્યા છે.
ઇસરોના ચેરમેન કે. શિવને જણાવ્યું કે બંને હ્યુમેનોઇડ શરીરના તાપમાન અને ધડકન સંબંધિત ટેસ્ટ કરાશે. ઇસરો ગગનયાન મિશન માટે ત્રણ અંતરિક્ષયાત્રીઓની પસંદગી કરશે. તેની પસંદગી અને પ્રશિક્ષણની પ્રક્રિયા આ જ વર્ષે શરૂ થશે.
ટ્રેનિંગ વિવિધ તબક્કાઓમાં થશે. પહેલા તબક્કામાં ૧૦થી ૧પ અંતરિક્ષયાત્રીઓની પસંદગી થશે. ટ્રેનિંગના દરેક તબક્કામાં પાસ થનારા ત્રણ લોકો અંતરિક્ષમાં જશે. અંતરિક્ષયાત્રીઓની પસંદગી અને ટ્રેનિંગ માટે અન્ય દેશોની અંતરિક્ષ એજન્સીઓની મદદ લેવાશે કેમ કે ભારતને આ ક્ષેત્રનો અનુભવ નથી.
અંતરિક્ષયાન જીએસએલવી મેક-૩ને માનવ મિશનને અનુરૂપ બનાવવાનું કામ પણ આ વર્ષે શરૂ થશે. હજુ જીએસએલવી પે-લોડ જ લઇ જાય છે. ઓર્બિટલ મોડ્યૂલનો ટેસ્ટ પણ આ જ વર્ષે શરૂ થશે.
તેને ક્રૂ મોડ્યૂલ અને સર્વિસ મોડ્યૂલ સાથે મિક્સ કરીને બનાવાશે. ક્રૂ મોડ્યૂલમાં અંતરિક્ષયાત્રી રહેશે. સર્વિસ મોડ્યૂલમાં તેની જરૂરિયાતનાં સામાન અને ઉપકરણ હશે. આ મિશન પર લગભગ ૧૦ ૦૦૦ કરોડ ખર્ચાશે. આ દુનિયાનું સૌથી સસ્તું માનવ અંતરિક્ષ મિશન હશે.
દેશમાં રિસર્ચ-ઇનક્યુબેશન સેન્ટર ખૂલશે
ઇસરો વિદ્યાર્થીઓ માટે દેશભરમાં છ-છ રિસર્ચ અને ઇનક્યુબેશન સેન્ટર ખોલશે. આ માટે તમામ રાજ્ય અને કેન્દ્ર શાસિત પ્રદેશોમાંથી ૩-૩ વિદ્યાર્થીઓની પસંદગી થશે. તેમને એક મહિનો ઇસરોમાં કામ કરવાનો મોકો પણ મળશે. ત્રિપુરા અને જાલંધરમાં ઇનક્યુબેશન સેન્ટર ખોલવામાં આવી ચૂક્યાં છે.
આ વર્ષે ૩ર મિશન પર કામ
ઇસરો ર૦૧૯માં ૩ર મિશન પૂરાં કરશે જેમાં ૧૪ લોન્ચ મિશન ૧૭ સેટેલાઇટ મિશન અને એક ડેમોન્સ્ટ્રેશન મિશન હશે. કેટલાંક મહત્ત્વપૂર્ણ મિશન ચંદ્રયાન-ર જીસેટ-ર૦ માઇક્રો રિમોટ સેન્સિંગ ઉપગ્રહ એસએસએલવીનું પહેલું પક્ષેપણ અને રિયુઝેબલ લોન્ચ વિહિકલ ટેકનોલોજીના ડેમો લેન્ડિંગનું પરીક્ષણ છે.