ઈન્ડિયન સ્પેસ રિસર્ચ ઓર્ગેનાઇઝેશન (ઇસરો) ભારતના ધ્રુવીય ઉપગ્રહ પ્રક્ષેપણ યાન (PSLV) દ્વારા આજે દેશના અદ્યતન જાસૂસી ઉપગ્રહ RISAT-2 BR1 અને નવ અન્ય વિદેશી જાસૂસી ઉપગ્રહ એકસાથે લોન્ચ કરશે, તેનું કાઉન્ટડાઉન શરૂ થઇ ચૂક્યું છે. આજે બપોરે ૩-૦૦ વાગ્યે રોકેટ પીએસએલવી સી-૪૮થી RISAT-2 BR1 સાથે ઉડાન ભરશે. RISAT-2 BR1 એક રડાર ઇમેજિંગ ઉપગ્રહ છે, તેનું વજન ૬ર૮ કિલોગ્રામ છે.
ISRO દેશના અદ્યતન જાસૂસી ઉપગ્રહ RISAT-2 BR1ને લોન્ચ કરશે
RISAT-2 BR1 સાથે નવ અન્ય વિદેશી જાસૂસી ઉપગ્રહ એકસાથે લોન્ચ કરાશે
RISAT-2 BR1ને પ૭૬ કિલોમીટરની ક્ષમતામાં સ્થાપિત કરવામાં આવશે
આ રોકેટ આંધ્રપ્રદેશના શ્રીહરિકોટા રોકેટ પોર્ટથી પ્રથમ લોન્ચપેડ ખાતે લોન્ચ કરવામાં આવશે અને RISAT-2 BR1ને પ૭૬ કિલોમીટરની ક્ષમતામાં સ્થાપિત કરવામાં આવશે. RISAT-2 BR1 સાથે નવ વિદેશી જાસૂસી ઉપગ્રહ પણ મોકલવામાં આવશે, જેમાં અમેરિકાના (મલ્ટિમિશન લેમુર-૪ સેટેલાઇટ), ટેક્નોલોજી ડેમોન્સ્ટ્રેશન ટાઇવાક-૦૧ર૯, અર્થ ઇમેજિંગ (હોપ સેટ), ઇઝરાયેલના (રિમોટ સેન્સિંગ ડૂચીફટ-૩), ઇટાલીના (સર્ચ એન્ડ રેસ્ક્યૂ ટાઇવાક (૦૦૯ર) અને જાપાનના (કયુપીએસ-એસએઆર રડાર ઇમેજિંગ અર્થ ઓબ્ઝર્વેશન સેટેલાઇટ)ના ઉપગ્રહનો સમાવેશ થાય છે.
નિષ્ણાતોની વાત માનીએ તો આ ઉપગ્રહ ભારતીય સીમાઓની સુરક્ષાની દૃષ્ટિએ અત્યંત ખાસ છે. તેને ભારતની બીજી આંખ કહેવાય છે. RISAT-2 BR1 સેટેલાઇટ પૃથ્વીની કક્ષામાં સ્થાપિત થયા બાદ ભારતની રડાર ઇમેજિંગ તાકાત કેટલાય ગણી વધી જશે. તેની મદદથી ભારતીય સીમાઓની દેખરેખ અને તેની સુરક્ષાઓને અભેદ બનાવવાનું પ્લાનિંગ સરળ બની જશે.
આ ઉપગ્રહ પોતાની કક્ષામાં સ્થાપિત થયા બાદ તરત જ કામ કરવાનું શરૂ કરી દેશે અને થોડા સમય બાદ તસવીરો મળવાનું પણ શરૂ થઇ જશે. આ ઉપગ્રહ કોઇ પણ મોસમમાં સ્પષ્ટ તસવીરો લઇ શકશે. વાદળની હાજરીમાં પણ દુશ્મનની ગતિવિધિ પર નજર રાખશે એટલું જ નહીં, રાહતકાર્યમાં પણ ભરપૂર મદદ મળશે.