ઇઝરાયલ હમાસ યુદ્ધ / ગાઝામાં ઇઝરાયલની મોટી એર સ્ટ્રાઇક, 100થી વધુ ફિલિસ્તીનીઓના મોત, અનેક ઘાયલ

ગાઝામાં ઇઝરાયલ દ્વારા સતત બોમ્બમારો અને હવાઈ હુમલા થઈ રહ્યા છે. હવે એવા સમાચાર સામે આવી રહ્યા છે કે તાજા હવાઈ હુમલામાં 100 થી વધુ પેલેસ્ટિનિયન નાગરિકો માર્યા ગયા છે. એક અહેવાલ અનુસાર, પૂર્વી ગાઝામાં વિસ્થાપિત લોકો રહેતી એક શાળાને નિશાન બનાવીને કરવામાં આવેલા ઇઝરાયલી હુમલામાં 100 થી વધુ લોકો માર્યા ગયા છે અને ડઝનો ઘાયલ થયા છે.

હમાસ સંચાલિત ગાઝા સરકારના મીડિયા કાર્યાલયના જણાવ્યા અનુસાર, આ હુમલો ત્યારે થયો જ્યારે લોકો નમાજ અદા કરી કરી રહ્યા હતા. કાર્યાલયે એક નિવેદનમાં જણાવ્યું કે, "ઇઝરાયલી હુમલાઓએ વિસ્થાપિત લોકોને નિશાન બનાવ્યા જ્યારે તેઓ ફજર (સવાર)ની નમાઝ અદા કરી રહ્યા હતા, જેના કારણે જાનહાનિની ​​સંખ્યામાં તીવ્ર વધારો થયો."

સતત હુમલા કરી રહ્યું છે ઇઝરાયલ

ગત સપ્તાહે ગાઝામાં ચાર શાળાઓ પર હુમલો કરવામાં આવ્યો હતો. 4 ઓગસ્ટના રોજ, ગાઝા શહેરમાં વિસ્થાપિત લોકો માટે આશ્રયસ્થાનો તરીકે વપરાતી બે શાળાઓ પર ઇઝરાયલના હુમલામાં 30 લોકો માર્યા ગયા અને અન્ય ઘણા લોકો ઘાયલ થયા. આ પહેલા ગાઝા શહેરની હમામા સ્કૂલ પર ઇઝરાયલે કરેલા હુમલામાં 17 લોકો માર્યા ગયા હતા. 1 ઓગસ્ટના રોજ દલાલ અલ-મુગરાબી સ્કૂલ પર ઇઝરાયલના હુમલામાં 15 લોકો માર્યા ગયા હતા. ઇઝરાયલ દાવો કરે છે કે કમ્પાઉન્ડની અંદર "આતંકવાદીઓ" છે જે "હમાસ કમાન્ડ કંટ્રોલ સેન્ટર" તરીકે કામ કરી રહ્યા છે.

7 ઓક્ટોબર, 2023 ના રોજ, પેલેસ્ટિનિયન જૂથ હમાસે ગાઝા પટ્ટીથી દક્ષિણ ઇઝરાયલના ગાઝા વિસ્તારમાં સશસ્ત્ર ઘૂસણખોરી કરીને ઇઝરાયલ પર આશ્ચર્યજનક હુમલો કર્યો. આને પેલેસ્ટાઈન દ્વારા દાયકાઓમાં સૌથી મોટા હુમલા તરીકે જોવામાં આવ્યો. આ સમયગાળા દરમિયાન, લગભગ 1,200 લોકો માર્યા ગયા અને ઘણાને કેદી બનાવી લેવામાં આવ્યા. ઇઝરાયલે યુદ્ધના ધોરણે આનો જવાબ આપ્યો અને અત્યારે પણ સંઘર્ષ ચાલુ છે. ત્યારથી ઇઝરાયલ ગાઝામાં શાળાઓ સહિતની ઇમારતો પર સતત હુમલા કરી રહ્યું છે.

આ પણ વાંચો: બ્રાઝીલમાં ઘટી મોટી વિમાન દુર્ઘટના: પ્લેનમાં હતા 62 યાત્રીઓ સવાર, તમામના મોત

40 હજારથી વધુ લોકોના થઈ ચુક્યા છે મોત

ગાઝામાં 10 મહિનાથી ચાલી રહેલા યુદ્ધમાં 40,000 થી વધુ પેલેસ્ટિનિયન માર્યા ગયા છે. યુદ્ધગ્રસ્ત તટીય પેલેસ્ટિનિયન વિસ્તારમાં યુદ્ધવિરામ માટે વાટાઘાટોના અનેક રાઉન્ડ યોજાયા છે, પરંતુ હજુ સુધી કોઈ સફળતા મળી નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ