ભારત અને ચીનના સૈનિકો વચ્ચે હિંસક અથડામણ બાદથી સરહદ પર પરિસ્થિતિ હજુ પણ તણાવપૂર્ણ છે. દેશની સેના દુશ્મનને જડબાતોડ જવાબ આપવા તૈયાર છે અને ભારતના શૂરવીર સૈનિકો પણ સરહદ પર વિષમ પરિસ્થિતિમાં પણ ભારતમાતાની રક્ષા કરી રહ્યા છે ત્યારે સરહદ પર સેના દ્વારા અભૂતપૂર્વ તૈયારીઓ કરી દેવાઈ છે. ડ્રેગન પર નજર રાખવા માટે ખાસ ટેકનોલોજીનો ઉપયોગ થઇ રહ્યો છે.
ઈઝરાયલના ડ્રોનની મદદથી ડ્રેગન પર નજર
આજે સેના પ્રમુખ નરવણે પરિસ્થિતિ જોવા લેહ જશે
વાયુસેનાના એરક્રાફ્ટના ગડગડાટથી ગૂંજી રહ્યું છે લેહ
ભારત અને ચીન સરહદ પર તણાવપૂર્ણ સ્થિતિને જોતા ભારતની સેના અને એરફોર્સ દ્વારા ચીન પર નજર રાખવા માટે હાલમાં જ ઇઝરાયલથી ખરીદેલા માનવરહિત ડ્રોનની મદદ લેવામાં આવી રહી છે. ભારત ચીન સરહદ પર સેનાની સાથે ITBPના જવાનોને મોકલવામાં આવી રહ્યા છે. હિમાલયના ઊંચા શિખરો પર લડવામાં ઘાતક ટીમ પણ ચીની સેનાનો સામનો કરવા તૈયાર છે.
નોંધનીય છે કે ચીન સાથે વણસતી પરિસ્થિતિને જોતા ભારતીય સેનાએ ચીનની હરકત સામે લડવા માટે સેનાને પૂરી છૂટ આપી દીધી છે. ઈમરજન્સી જેવી પરિસ્થિતિમાં સેના હથિયાર ખરીદી શકે તે માટે પાંચસો કરોડ રૂપિયાનું સ્પેશીયલ ફંડ પણ આપવામાં આવ્યું છે. નોંધનીય છે કે ચીની સેનાની જેમ જ ભારત પણ આર્મ્ડ ડ્રોન ખરીદવાની તૈયારી કરવામાં આવી રહી છે.
ઇન્ડિયન એક્સ્પ્રેસના અહેવાલ મુજબ લેહમાં વાયુસેનાની પેટ્રોલિંગ વધારી દેવામાં આવી છે. લેહના લોકો કહી રહ્યા છે કે 1999 બાદ પહેલીવાર વાયુસેનાની આટલી સક્રિયતા જોવા મળી રહી છે. એરક્રાફ્ટ અને હેલિકોપ્ટર્સ સતત આ વિસ્તારોમાં ચક્કર લાગવી રહ્યા છે. પંજાબ હરિયાણામાં ફાઈટર એરક્રાફ્ટ તૈનાત કરી દેવામાં આવ્યા છે.