નવી મુંબઇના ઉરાન ક્ષેત્રમાં આવેલ એક બ્રિજના પિલ્લર પર આતંકી સંગઠન ISISના સમર્થનમાં મેસેજ લખેલા જોવા મળતા ચકચાર મચી જવા પામેલ. જો કે, આ મામલાની નોંધ સ્થાનિક પોલીસ દ્વારા ગંભીરતાથી લેવામાં આવતા તપાસ હાથ ધરવામાં આવી છે તથા હાઇ એલર્ટ પણ જાહેર કરવામાં આવ્યું છે. આ પ્રકારના લખાણ અંગેની જાણ મહારાષ્ટ્ર ATSને થતાં જ તપાસ વધુ મજબૂત રીતે કરવામાં આવી છે.
ઉલ્લેખનીય છે કે, આ પ્રકારના લખાણ નવી મુંબઇના ઉરાન ક્ષેત્રમાં આવેલ ખોપ્ટેબ્રિજ પર જોવા મળ્યા હતા, આ વિસ્તાર રાયગઢ જિલ્લાની હદમાં આવે છે. પોલીસે આ મામલે આસપાસના CCTV કેમેરાના ફૂટેજ તપાસવાની કામગીરી આદરી છે. નવી મુંબઇના એક વરિષ્ઠ અધિકારીએ કહ્યું કે, એક અલગ ટીમ અને નવી મુંબઇ ક્રાઇમ બ્રાંચ આ મામલાની તપાસ કરી રહી છે.
બ્રિજની થાંભલાની દિવાલમાં લખવામાં આવેલ આ સંદેશાઓમાં ISISના વખાણ કરવામાં આવ્યા છે. સાથે જ હાફિઝ સઇદના નામનો ઉલ્લેખ અને ISIS માટે લડનાર અબુ બકર અને અલ બગદાદીની પણ પ્રસંશા કરવામાં આવી છે. આપને જણાવી દઇએ કે, આ વિસ્તારમાં ONGC, આર્મરી સ્ટેશન, પાવર સ્ટેશન અને JNPT આવેલ છે, જેને લઇને જોખમ વધુ હોવાથી સ્થાનિક પોલીસ દ્વારા ગંભીરતાથી તપાસ કરવામાં આવી રહી છે.
આ મામલે એક ઉચ્ચ અધિકારીએ કહ્યું કે, કોઇ સ્થાનિક વ્યક્તિ દ્વારા પણ આ પ્રકારની હરકત કરવામાં આવી હોય તેવું પણ પ્રાથમિક તપાસમાં લાગી રહ્યું છે. જો કે, આ બાબતને સરળતાથી લઇ ન શકાય. જ્યાં આ પ્રકારના લખાણ મળી આવ્યા છે ત્યાં આસપાસમાં ખાસ CCTV પણ જોવા મળ્યા નથી.