મુંબઇ: છેલ્લા ઘણા દિવસોથી ઉદ્યોગપતિ મુકેશ અંબાણીના પુત્ર આકાશ અંબાણીની થનાર પત્ની શ્લોકા મહેતા ઘણી વખત શોપિંગ કરતાં જોવા મળ્યા છે. તાજેતરમાં જ એ લોકોને મુંબઇમાં મોનિશા જયસિંહના સ્ટોરની બહાર સ્પોટ કરવામાં આવ્યા હતા. ત્યારબાદ એવો અંદાજો લગાવવામાં આવ્યો હતો કે મુકેશ અંબાણીના ઘરે જલ્દી શરણાઇ વાગશે. હવે પૂરી રીતે કન્ફર્મ થઇ ગયું છે કે આ વર્ષે માર્ચમાં આકાશ અંબાણી અને શ્લોકા મહેતા લગ્ન કરશે. બંનેના લગ્નની તારીખ પણ નક્કી થઇ ગઇ છે.
એક મીડિયા રિપોર્ટ અનુસાર આ વર્ષે 9 માર્ચે આકાશ અને શ્લોકા લગ્નના બંધનમાં બંધાશે. બંનેના લગ્નનો સમારોહ મુંબઇના જિયો વર્લ્ડ સેન્ટરમાં 3 દિવસ સુધી ચાલશે. આકાશ અંબાણીની જાન સાંજે 3.30 એ જિયો સેન્ટર જશે.
10 માર્ચે આકાશ અને શ્લોકાનું વેડિંગ સેલિબ્રેશન થશે. એના બીજા દિવસે એટલે કે 11 માર્ચે વેડિંગ રિસેપ્શન યોજાશે. આ ફંક્શનમાં બંને પરિવારના લોકો અને નજીકના લોકો સામેલ થશે. આ તમામ કાર્યક્રમ પણ જિયો સેન્ટરમાં જ થશે.
મળતી માહિતી અનુસાર લગ્ન પહેલા આકાશ અંબાણી પોતાની બેચલર પાર્ટી કરી રહ્યો છે જે સ્વિટ્ઝરલેન્ડના સેન્ટ મોરિટ્ઝમાં હશે. આ પાર્ટીમાં ઘણી મોટી મોટી ફિલ્મ હસ્તીઓ પણ પહોંચશે. આ સેલિબ્રેશન 23 થી 25 ફેબ્રુઆરી સુધી ચાલશે. જણાવી દઇએ કે રણબીર કપૂર આકાશનો ખૂબ જ નજીકનો મિત્ર છે અને તે આ પાર્ટીમાં જોવા મળશે. સિંગલ કરણ પણ આ બેચલર પાર્ટીનો ભાગ બનશે.
ઉલ્લેખનીય છે કે ડિસેમ્બર મહિનામાં મુકેશ અંબાણીએ પુત્રી ઇશા અંબાણીના લગ્ન આનંદ પીરામલ સાથે ખૂબ જ શાનદાર રીતે કર્યા હતા. જેમાં દેશના મોટી રાજકીય અને ફિલ્મી હસ્તીઓની સાથે મોટા બિઝનેસમને હાજરી આપી હતી.