રાજ્યમાં શિક્ષણની કેવી સ્થિતિ છે. તેની વધુ એક તસ્વીર તમને બતાવીએ. રાજકોટના ધોરાજીના કુંભારવાડામાં શાળા નંબર-14 આવેલી છે. પરંતુ ચોંકાવનારી વાત તો એ છે કે, આ શાળા કોઇ મકાનમાં નહીં પરંતુ કમર્શિયલ દુકાનોમાં ચાલે છે. અને આ સ્થિતિ સરકાર દ્વારા શિક્ષણને લઇને કરવામાં આવતા દાવાઓને પોકળ સાબિત કરી રહી છે. શાળા નંબર-14 એક બે વર્ષ નહીં પરંતુ 40 વર્ષથી આ જ હાલમાં ચાલે છે સરકારો બદલાઇ અધિકારીઓ બદલાયા પરંતુ કુંભારવાડા શાળાની સ્થિતિ તેની તે જ છે. માસૂમ બાળકોને ભણવું તો છે પરંતુ પૂરતી સુવિધા નથી.
ત્યારે બાળકોની આ વાત લઇ અમે તાલુકા શિક્ષણ અધિકારી પાસે ગયા જ્યાં તેઓ પાસે આ સ્થિતિને લઇ કોઇ જવાબ ન હતો. અને જે જવાબ આપ્યો તે પણ જાણે બચાવ કરી રહ્યા હોય તેવું લાગી રહ્યું છે. અને જે વર્ષોથી સાંભળતા આવ્યા છે તે જ કહ્યું કે, આગામી સમયમાં કામ થઈ જશે.
આ માસૂમ બાળકોની વાત ન તો સરકારને સંભળાય છે. ન અધિકારી સાંભળે છે. અને શાળાના શિક્ષકો પણ કંઇ કહેવા તૈયાર નથી. છેલ્લા 40 વર્ષથી આ શાળા આ રીતે જ ચાલે છે પરંતુ કોઇ આ સમસ્યાના ઉકેલ માટે આગળ નથી આવતું. શાળા રોડ પર જ છે જ્યારે વાહનોની અવરજવર રહે છે પરંતુ આ બાળકોની ચિંતા કોને છે.