શિયલ મીડિયા પર સોનિયા ગાંધીની સંપત્તિ અંગે ખુબ જ ચર્ચા થઇ રહી છે. દાવો છે કે સોનિયા ગાંધી બ્રિટનની રાણી એલીઝાબેથ કરતા પણ વધારે મિલકત ધરાવે છે. સોશિયલ મીડિયા પર આ દાવા સાથે એક સમાચાર પત્રની વેબસાઇટની લિંક પણ પુરાવા રૂપે શેર કરવામાં આવી રહી છે. તો કેટલી છે સોનિયા ગાંધીની સંપત્તિ અને સોશિયલ મીડિયા પર કરવામાં આવેલો દાવો કેટલો સાચો છે તે અંગે તપાસ કરી અને તેમાં શું પરિણામ આવ્યું જુઓ વાયરલ ટ્રુથના આ રિપોર્ટમાં.
સોનિયા ગાઁધીની સંપત્તિ અંગે દાવો કરતી ટ્વીટના અમે સ્ક્રીન શોટ્સ લીધા. જેમાં આ ટ્વીટ કરી છે ભાજપના પ્રવક્તા અશ્વિની ઉપાધ્યાયે. અશ્વિની લખે છે કે કોંગ્રેસની એલિઝાબેથ બ્રિટેનની મહારાણીથી અને કોંગ્રેસના સુલતાન ઓમાનના સુલતાન કરતા પણ વધુ ધનિક છે. ભારત સરકારે વહેલી તકે કાયદો બનાવીને આ લોકોની 100 ટકા બિનહિસાબી સંપત્તિને જપ્ત કરી લેવી જોઇએ અને આજીવન કેદની સજા ફટકારવી જોઇએ.
અશ્વિની ઉપાધ્યાયે આ ટ્વીટની વેબસાઇટના અહેવાલની લિંક તો મૂકી જ પણ સાથે પ્રધાનમંત્રી મોદી અને પ્રધાનમંત્રીના કાર્યાલયના ટ્વીટર હેન્ડલને પણ ટેગ કરી દિધા. માત્ર ભાજપના પ્રવક્તા અશ્વિની ઉપાધ્યાયે જ નહી સોશિયલ મીડિયા પર અન્ય લોકોએ પણ આ જ દાવો કર્યો. કેટલાકે સોનિયાની વધુ પડતી સંપત્તિને કાળા નાણા સાથે જોડી તો કેટલાકે રાહુલ ગાંધીને સવાલ કર્યો કે હવે આના પર પણ કંઇક બોલો.
સોનિયા ગાઁધી 20 વર્ષ કરતા પણ વધુ સમયથી ભારતના રાજકારણમાં સક્રિય છે અને 2004માં તો તેઓ પ્રધાનમંત્રી બનશે તેવા પણ એંધાણ હતા. જોકે આખરે મનમોહન સિંહને પ્રધાનમંત્રી બનાવવામાં આવ્યા હતા પણ સોશિયલ મીડિયા પર થઇ રહેલા દાવા અને અંગ્રેજી વેબસાઇટના અહેવાલને જોઇને સવાલ ઉભો થાય છે કે શું સોનિયા ગાંધી બ્રિટનની રાણી કરતા પણ ધનિક છે? સોનિયા ગાંધી પાસે હાલમાં કેટલી સંપત્તિ છે? અંગ્રેજી સમાચારપત્ર હફિંગટન પોસ્ટનો દાવો કેટલો સાચો છે? શું દુનિયાના સૌથી ધનિક રાજકારણીમાં સોનિયા ગાંધી 12 ક્રમે આવે છે?
સોનિયા ગાંધી રાજકારણમાં સક્રિય હતા ત્યારે કોંગ્રેસની આગેવાનીવાળી યુપીએ સરકારે 10 વર્ષ શાસન કર્યું. એટલે સોનિયા ગાંધી પાસે અઢળક સંપત્તિ હોવાની વાત કેટલી સાચી તે અંગે અમે તપાસ કરવાનું નક્કી કર્યું અને તપાસની શરૂઆત જ અમે વાયરલ થયેલા લેખથી કરી. તો જાણવા મળ્યું કે ભાજપના પ્રવક્તાએ જે લેખની લિંક ટ્વીટમાં મૂકી છે. તે લેખ હમણા નથી છપાયો પણ 2 ડિસેમ્બર 2013ના રોજ છપાયો હતો. એટલે કે પાંચ વર્ષ પહેલા હવે આ લેખને અમે ઝીણવટ પૂર્વક વાંચો તો લેખમાં લખ્યું હતું કે હફિંગટન પોસ્ટે 20 ધનિક રાજકારણીઓની યાદી બનાવી હતી. જેમાં સોનિયા ગાંધીની સંપત્તિ 200 કરોડ અમેરિકન ડોલર છે. એટલે તેઓ 20 લોકોની યાદીમાં 12માં ક્રમે આવ્યા. પણ લેખના અંતમાં લખ્યું હતું કે અંગ્રેજી સમાચારપત્ર હફિંગટન પોસ્ટ પાસે સોનિયા ગાંધીની સંપત્તિ અંગેની જાણકારી ક્યાંથી આવી તે સ્પષ્ટ નથી. એટલે હફિંગટન પોસ્ટને મળેલા આંકડાને પુરો સાચો કે પૂર્ણ રીતે ખોટો ન માની શકાય.
હવે અમે પૂર્ણ સત્ય જાણવા માટે હફિંગટન પોસ્ટની વેબસાઇટ પર પહોંચ્યા અને 2013માં તેણે છાપેલા અહેવાલને શોધી કાઢ્યો. હફિંગટન પોસ્ટે આ અહેવાલને 29 નવેમ્બર 2013ના રોજ છાપ્યો હતો પણ આ જ અહેવાલને 2 ડિસેમ્બર 2013ના રોજ અપડેટ કર્યો. આ અહેવાલમાં અમને હફિંગટન પોસ્ટના અડિટર દ્વારા છાપવામાં આવેલી એક સૂચના જોવા મળી જેમાં લખ્યું હતું કે સોનિયા ગાંધી અને કતરના સુલતાન હમિદ બિન ખલીફા અલ-થાનીનું નામ હટાવી દેવામાં આવ્યું છે. કારણ કે આ બન્નેની સંપત્તિ અંગે અમારી પાસે પુરાવા ન હતા. એટલે જ્યાંથી સંપત્તિની વાત ઉઠી હતી તે જ સમાચાર સંસ્થાએ આંકડા સાચા હોવા અંગે શંકા વ્યક્ત કરી દિધી અને એ પણ આજથી પાંચ વર્ષ પહેલા.
હવે તમને સવાલ થશે કે આખરે સોનિયા ગાંધીની સંપત્તિ કેટલી છે. તો ચાલો તમારા આ સવાલનો પણ જવાબ આપી દઇએ અને એ પણ સરકારી પુરાવા સાથે. અહેવાલ સોનિયા ગાંધીએ 2014માં રાયબરેલીથી કરેલી ઉમેદવારી સમયનો છે. ઉમેદવારી સમયે સોનિયા ગાંધીએ એફિડેવીટ સાથે પોતાની સંપત્તિ જાહેર કરી હતી. જેમાં જાણકારી આપી હતી કે તેમની પાસે કુલ 10 કરોડ રૂપિયાની સંપત્તિ છે. જેમાં 66 લાખ રૂપિયાની બેંક ડિપોઝીટ 11 લાખ રૂપિયાના સિક્યોરિટી બોન્ડ 85 લાખ રૂપિયા મ્યુચ્યુઅલ ફંડમાં છે. જ્યારે હાથ પર રોકડ 85 હજાર રૂપિયા. એટલે ક્યાં 200 કરોડ અમેરિકન સંપત્તિ હોવાનો દાવો અને ક્યાં 10 કરોડ રૂપિયાની સંપત્તિના દસ્તાવેજની વાત. એટલે અમારી તપાસમાં સ્પષ્ટ થઇ ગયું કે સોનિય ગાંધીની સંપત્તિ બ્રિટેનની રાણી એલિઝાબેથ-2 કરતા પણ વધુ હોવાનો દાવો ખોટો છે.