ગુજરાતમાં તાજેતરમાં જ યોજાયેલ પેટાચૂંટણીમાં 6 માંથી 3 બેઠકો પર ભાજપની હાર થતાં ભારતીય જનતા પાર્ટીના હાઇકમાન્ડમાં નારાજગી જોવા મળી રહી હોય તેમ લાગી રહ્યું છે. પેટાચૂંટણીના પરિણામો બાદ તરત જ દિવાળીના અવસર પર ગુજરાત આવેલા ભાજપના રાષ્ટ્રીય અધ્યક્ષ અને ગૃહમંત્રી અમિત શાહે ભાજપના સ્થાનિક નેતાઓ પ્રત્યે નારાજગી વ્યક્ત કરી હતી તેવી ચર્ચાએ પણ જોર પકડ્યું હતું.
ભાજપ હાઇકમાન્ડ ગુજરાતના નેતાઓથી નારાજ
દર મહિને હાઈકમાન્ડથી ગુજરાતની મુલાકાતોનો દોર વધશે
પેટા ચૂંટણીના પરિણામો બન્યા કારણ
ત્યારે ચર્ચા તો એવી પણ ચાલી રહી છે કે એકતા દિવસના અવસરે સ્ટેચ્યુ ઓફ યુનિટીની મુલાકાતે આવેલ પ્રધાનમંત્રી મોદીની સાથે કોઈ પણ સ્થાનિક નેતાઓ દેખાયાં ન હતાં.
ગુજરાત ભાજપના સંગઠનમાં ફેરફાર થવાના ભણકારા
પેટાચૂંટણીમાં 3 બેઠકોની હાર પાછળનું મોટું કારણ ગુજરાત ભાજપના નેતાઓના આંતરિક વિખવાદને આભારી છે. જો સૂત્રોની વાત માનીએ તો, પ્રાદેશિક પક્ષપ્રમુક પક્ષના નેતાઓ વચ્ચેના ઝઘડાને રોકવામાં સંપૂર્ણપણે નિષ્ફળ ગયા છે. આગામી મહિનાઓમાં ગુજરાત ભાજપ સંગઠનમાં પણ મોટા ફેરફારો થવાની સંભાવના છે.
દર મહિને હાઇ કમાન્ડ ગુજરાતની મુલાકાત લેશે
આવી સ્થિતિમાં ચર્ચા થઈ રહી છે કે હવે પોતાની સીધી નજર ગુજરાત પર બની રહે તેથી દર મહિને હાઈકમાન્ડથી મુલાકાતોનો દોર વધશે. આવામાં સૂત્રો પ્રમાણે અમિત શાહ હવે 15 નવેમ્બરના રોજ ગુજરાતમાં પાછા આવી રહ્યા છે, જ્યારે પ્રધાનમંત્રી મોદી પણ 21-22 નવેમ્બરના રોજ ગુજરાતમાં આવી રહ્યાંની ચર્ચા ચાલી રહી છે.
શાહ-મોદીનું ઘર છે ગુજરાત
ઉલ્લેખનીય છે કે ગુજરાત PM નરેન્દ્ર મોદી અને ભાજપ અધ્યક્ષ અમિત શાહની જન્મભૂમિ અને કર્મભૂમિ બંને છે. જ્યારે ગુજરાતના રાજકારણથી જ આ બંને નેતાઓ કેન્દ્રમાં પહોંચ્યા હોય ત્યારે પોતાના ગુજરાતમાં પક્ષની સ્થિતિ બગડે નહીં તેની ખાસ તકેદારી રાખશે. ઉપરાંત અહીં પરિવર્તનની અસર સમગ્ર દેશના રાજકારણને અસર કરશે, જેના કારણે હાઈકમાન્ડ હવે આગામી મહિનાઓમાં એક્શન મોડમાં જોવી મળી શકે છે.
કોંગ્રેસે બેઠકો વધારી
જણાવી દઈએ કે ગુજરાતમાં 6 બેઠકોની પેટા ચૂંટણીમાં ભાજપ અને કોંગ્રેસ બંનેએ ત્રણ બેઠકો મેળવી છે. થરાદ બેઠક 15 વર્ષ બાદ જીતીને કોંગ્રેસે સૌને ચોંકાવી દીધા. બંને પક્ષોએ તેમની પરંપરાગત બેઠકો કબજે કરી છે. પેટાચૂંટણીમાં ભાજપ અને કોંગ્રેસ બંને એકસમાન બેઠક પર અટવાઈ ગયા છે. બંનેને છમાંથી ત્રણ બેઠકો મળી છે અને બંનેએ પોતાની પરંપરાગત બેઠકો જાળવી રાખી હતી, પરંતુ કોંગ્રેસે આગેકૂચ કરી હતી.