ભારે વહીવટ / નર્મદા નિગમનો પાણી મુદ્દે બેધારો નિર્ણય: જ્યાં જરૂર નથી ત્યાં પાણીની રેલમછેલ, ઉત્તર ગુજરાતમાં તાતી જરૂર ત્યાં બંધ, ખેડૂતો મુશ્કેલીમાં

• મહેસાણા સહિત ઉત્તર ગુજરાતમાં નર્મદાનું પાણી નહીં મળે
• આવતીકાલથી પિયત માટે પાણી બંધ કરાશે
• ઉનાળાની શરૂઆતમાં જ પાણી બંધ કરવાનો આદેશ છૂટયો 

મહેસાણા અને ઉત્તર ગુજરાતના ખેડૂતો માટે માઠા સમાચાર આવી રહ્યા છે. સમગ્ર ઉત્તર ગુજરાતમાં નર્મદાના સિચાઈનું પાણી બંધ કરી દેવામાં આવ્યું છે. ઉનાળાની શરૂઆતમાં જ  પિયત માટે પાણી બંધ કરવાના નિર્ણયથી ખેડૂતો ચિંતિત બની ગયા છે.

બનાસકાંઠામાં કેનાલોમાં આજથી સિંચાઇ માટે પાણી બંધ
બનાસકાંઠામાં સરહદીય વિસ્તારની કેનાલોમાં સિંચાઇ માટે પાણી બંધ કરવામાં આવ્યું છે.આજથી સરહદીય કેનાલોમાં સિંચાઇનું પાણી આપવામાં આવશે નહીં.વાવ, થરાદ, સુઇગામ, ભાભરના ખેડૂતોમાં નર્મદાના કેનાલમાં સિંચાઇનું પાણી બંધ કરવાના નિર્ણયથી ખેડૂત ચિંતિત છે. વાવ-થરાદના ધારાસભ્યો સહિત ખેડૂત સંગઠનો દ્વારા રજૂઆત કરાઇ છે.કેનાલમાં સિંચાઇનું પાણી ચાલુ રાખવા માંગ કરાઇ હતી.જિલ્લામાં વાવેતર સમયે જ સિંચાઇના પાણીની તંગી સર્જાઇ શકે છે.ધરતીપુત્રોને બાજરી, જુવાર સહિતના પાકોને પાણી આપવું મુશ્કેલ બનશે. જિલ્લાના બંને મુખ્ય ડેમ તળિયા ઝાટક અને નર્મદાની કેનાલોમાં આજથી પાણી બંધ કરવામાં આવતા ઉનાળુ પાક લેવા ઈચ્છુક ખેડૂતોની આશા પર પાણી ફરી વળ્યું છે.

તૈયાર પાક ઉભો છે ત્યારે પાણી આવ્યું
તો બીજી તરફ  નર્મદાની કોરી રહેતી કેનાલમાં પાણી આવતા ખેડૂતો મુશ્કેલીમાં મુકાયા છે. એક તરફ ઘઉં લણણી કામગીરી ખેડૂતો કરી રહ્યા છે તેવા સમયે કોરી તૂટેલી કેનાલમાં નિગમ દ્વારા પાણી છોડી દેવામાં આવતા તૈયાર ઊભા પાક પર પાણી ફરી વળ્યું છે. અમદાવાદના છેવાડાના રેઠલ, દદુકા, ઉપરદળ સહિતના ગામમાં જરૂર સમયે પાણી મળે તો  1000 હજાર હેક્ટર પાક બચી શકે છે પણ તંત્ર મનફાવે તેમ નિર્ણય લઈ ક્યાંય પાણી બંધ કરી રહ્યું છે તો ક્યાંય વણજોઈતું પાણી છોડવામાં આવી રહ્યું છે. ખેડૂતો આરોપ કરી રહ્યા છે કે જ્યારે પાણી આવે ત્યારે કોઇ કામ નથી આવતું એમ જ વેડફાઇ જાય છે. સરકારે અને ખાસ કરીને નર્મદા નિગમે આ વાત ગંભીરતાથી ધ્યાને લે તેમજ ઊભા પાકની નુકસાનીનું વળતર ચૂકવવામાં આવે તેવી માંગ કરવામાં આવી છે.