બદલાવ / હવે ફાઈવ સ્ટાર હોટલ જેવા હશે ટ્રેનના ફર્સ્ટ એસી કોચ

કાનપુરથી નવી દિલ્હી સુધી ચાલનાર રિવર્સ શતાબ્દી અને શ્રમ શક્તિ એક્સપ્રેસમાં સફળ પ્રયોગ બાદ રેલવે બોર્ડે દરેક ટ્રેનના ફર્સ્ટ એસી કોચમાં ગોલ્ડ સ્ટાન્ડર્ડ લાગુ કરવાના આદેશો આપ્યા છે. 

ટ્રેનમાં ફર્સ્ટ એસી કોચ રેલવેનો સૌથી મોંઘો ક્લાસ છે. તેનું ભાડું પ્લેનના ભાડાની બરાબર હોય છે. દરેક ફર્સ્ટ એસી કોચમાં આઠ કમ્પાર્ટમેન્ટ હોય છે, જેમાં ૧૮થી ૨૪ યાત્રી સફર કરી શકે છે. સુવિધાઓની બાબતમાં તે હજુ સૌથી બહેતર છે, પરંતુ તેનું સ્તર વધારે વધારી શકાય છે. સ્ટેશન ડિરેક્ટર ડો. જિતેન્દ્રકુમારે જણાવ્યું કે તેમને રેલવે બોર્ડથી એક પત્ર મળ્યો છે, જેમાં તમામ ટ્રેનના ફર્સ્ટ એસી કોચને ગોલ્ડ સ્ટાન્ડર્ડમાં ફેરવવાના આદેશ આવ્યા છે.
 

પરિવર્તન કર્યા બાદ આ કોચના કમ્પાર્ટમેન્ટ ફાઇવ સ્ટાર હોટલ જેવા લુકમાં દેખાશે. કાનપુર રેલવે પાસે ત્રણ ફર્સ્ટ એસી કોચ છે, જેમાંથી બે પહેલા જ ગોલ્ડ સ્ટાન્ડર્ડમાં ફેરવાઇ ચૂક્યા છે. બાકી બચેલા કોચને ગોલ્ડ સ્ટાન્ડર્ડમાં ફેરવવાનું કામ ખૂબ જલદી શરૂ થશે. એક કોચમાં લગભગ પાંચ લાખ રૂપિયાનો ખર્ચ આવશે. 

શું ફેરફાર કરાશે?
ગ્રાફિકથી દીવાલો સજાવાશે અને દરેક કમ્પાર્ટમેન્ટમાં આકર્ષક તસવીરો પણ લગાવાશે. ટોઈલેટના વોશ બેસિનમાં સેન્સર ટેપ લગાવાશે. હાથ સૂકવવા માટે હોટ એર મશીન લગાવાશે. બ્લેન્કેટની ગુણવત્તા સુધારાશે. કોચમાં અનસ્ક્રેચ પેઇન્ટનો ઉપયોગ કરાશે. પરફ્યુમ મશીન દર ૨૦ મિનિટે પોતાની જાતે સ્પ્રે કરીને માહોલ ખુશનુમા બનાવશે. લર્નિંગ લાઇટ લગાવાશે. રાત્રે કોઇ યાત્રી વાંચવા ઇચ્છે તો તેને સરળતા રહે. બાથરૂમમાં મલ્ટિટોવેલ અને લિક્વિડ શોપ મશીન લગાવાશે.