ગુજરાત રાજ્યના પોલીસ બેડામાં આજે મોટા ફેરફાર કરવામાં આવ્યા છે. રાજ્યના નવા વરણી માટે રાજ્યના ચીફ સેક્રેટરી અનિલ મુકીમ અને એડિશનલ ચીફ સેક્રેટરી ગૃહ વિભાગ સંગીતા સિંઘ UPSC સાથે દિલ્હી ખાતે મિટિંગ કરવા ગયા હતા. જે બાદ ગુજરાતના નવા પોલીસવડા તરીકે આશિષ ભાટિયાના નામની જાહેરાત કરવામાં આવી છે.
રાજ્યના નવા પોલીસવડાની જાહેરાત
દિલ્હીમાં આજે બેઠક બાદ નિર્ણય
આવતા એક બે દિવસમાં નવા પોલીસ કમિશનરની જાહેરાત
નોંધનીય છે કે રાજ્ય સરકારે કેન્દ્રીય જાહેર સેવા આયોગ (UPSC)ને નવા DGP માટે નામોની યાદી મોકલી આપી હતી જેમાંથી UPSC દ્વારા 3 નામો શોર્ટલિસ્ટ કરીને તેમાંથી રાજ્ય સરકાર રાજ્યના નવા પોલીસ વડાની પસંદગી કરી છે. હવે આશિષ ભાટિયાના નામ પર મહોર મારવામાં આવી છે.
અમદાવાદના પોલીસ કમિશનર આશિષ ભાટિયા જેઓ 1985ની ગુજરાત કેડરના IPS અધિકારી છે તેઓ રાજ્યના DGPની રેસમાં ફ્રન્ટ રનર માનવામાં આવતા હતા જેની સૌપ્રથમ ખબર VTVGujarati.comએ આપી હતી.
અમદાવાદના પોલીસ કમિશનર તરીકે આશિષ ભાટિયાની જગ્યાએ નવા પોલીસ કમિશનરની નિમણૂક આવતા એક બે દિવસમાં કરવામાં આવશે. જેમાં સંજય શ્રીવાસ્તવનું નામ સૌથી આગળ ચાલી રહ્યું છે.
મહત્વનું છે કે શિવાનંદ ઝા આમ તો આ વર્ષના એપ્રિલ મહિનામાં રિટાયર્ડ થવાના હતા પરંતુ કોરોના મહામારીને કારણે તેમનો ત્રણ મહિનાનો કાર્યકાળ લંબાવાયો હતો. અંદરના સૂત્રોના જણાવ્યા પ્રમાણે શિવાનંદ ઝાએ ત્રણ મહિના માટે વધુ એક વખત પોતાનો કાર્યકાળ લંબાવવા માટે પ્રયાસો કરી ચૂક્યા હતા. પરંતુ આ વખતે દિલ્હીથી રાજ્યમાં નવા DGP માટેની તૈયારીઓ શરૂ કરવાના આદેશ આપી દેવાયા હતા.
રાજ્યમાં નવા DGPની વરણી સાથે પોલીસ બેડામાં મોટા પ્રમાણમાં બદલી થશે તેમ માનવામાં આવે છે. આ સિવાય હવે અમદાવાદમાં પણ નવા પોલીસ કમિશનરની નિમણૂક કરવામાં આવશે.
નોંધનીય છે કે VTVGujarati.com પર ગુજરાતમાં પોલીસબેડામાં ફેરફાર કરવા નવા ડીજીપીની પસંદગીમાં આશિષ ભાટિયાનું નામ સૌથી આગળ ચાલી રહ્યું છે તે મુદ્દે સૌથી પહેલા માહિતી આપવામાં આવી હતી.