આઇપીએલની ૧૩મી સિઝનમાં સૌથી વધુ રન બનાવનારા પંજાબના બેટ્સમેનોની બોલબાલા છે. સૌથી વધુ રન બનાવનારા બેટ્સમેનોની યાદીમાં પ્રથમ સ્થાને કિંગ્સ ઈલેવન પંજાબનો કેપ્ટન કે. એલ. રાહુલ છે
બીજા સ્થાન પર મયંક અગ્રવાલ છે. ચેન્નઈનો ફાફ ડુ પ્લેસિસ ત્રીજા નંબર પર સરકી ગયો છે અને સંજુ સેમ્પસને ચોથું સ્થાન હાંસલ કરી લીધું છે. આ સાથે ગઈ કાલની જીત બાદ આઇપીએલના પોઇન્ટ ટેબલમાં રાજસ્થાન રોયલ્સે હનુમાન કૂદકો લગાવીને દિલ્હી કેપિટલ્સ બાદ બીજું સ્થાન હાંસલ કરી લીધું છે.
આઇપીએલની વર્તમાન સિઝનમાં અત્યાર સુધીમાં કુલ નવ મેચ રમાઈ ચૂકી છે. દરેક મેચમાં કોઈ ને કોઈ બેટ્સમેને અર્ધસદી ફટકારી છે. પંજાબના કેપ્ટન રાહુલે સિઝનની પ્રથમ સદી ફટકારી, જ્યારે ગઈ કાલની મેચમાં મયંક અગ્રવાલે સદી ફટકારી. આ વર્તમાન સિઝનની બંને સિઝન પંજાબના બેટ્સમેનોએ ફટકારી છે. આઇપીએલમાં જે બેટ્સમેન સૌથી વધુ રન બનાવને છે તે તેને ઓરેન્જ કેપ આપવામાં આવે છે. રાજસ્થાન અને પંજાબ વચ્ચે ગઈ કાલે રમાયેલી મેચ બાદ કે. એલ. રાહુલે ઓરેન્જ કેપ પર ફરી એક વાર કબજો જમાવી દીધો છે.
કે. એલ. રાહુલઃ
રાજસ્થાન સામે અર્ધસદી ફટકારતા જ ઓરેન્જ કેપ પર રાહુલે કબજો જમાવી દીધો. ત્રણ મેચમાં રાહુલે કુલ ૨૨૨ રન બનાવ્યા છે, જેમાં ૧૩૨ રનની સર્વોચ્ચ ઇનિંગ્સનો પણ સમાવેશ થાય છે. રાહુલે ૨૩ ચોગ્ગા અને નવ છગ્ગા ફટકાર્યા છે.
મયંક અગ્રવાલઃ
પંજાબનો જ મયંક અગ્રવાલ રન બનાવનારા બેટ્સમેનોની યાદીમાં બીજા સ્થાન પર છે. બે મેચમાં ૨૨૧ રન બનાવનારા આ બેટ્સમેને ગઈ કાલે રાજસ્થાન સામે શાનદાર સદી ફટકારી. તેનો સ્ટ્રાઇક રેટ ૧૭૦નો થઈ ગયો છે અને તે પોતાના કેપ્ટન રાહુલથી માત્ર એક જ રન પાછળ છે.
ફાફ ડુ પ્લેસિસઃ
સીએસકેનો બેટ્સમેન ફાફ ડુ પ્લેસિસ ત્રીજા નંબર પર સરકી ગયો છે. તેણે ત્રણ મેચમાં ૭૨ રનના સર્વોચ્ચ સ્કોર સાથે ૧૭૩ રન બનાવ્યા છે. ૧૪૯થી વધુ સ્ટ્રાઇક રેટથી રન બનાવનારા આ બેટ્સમેને બે અર્ધસદી ફટકારી છે. ફાફ અત્યાર સુધીમાં ૧૧ ચોગ્ગા અને સાત છગ્ગા ફટકારી ચૂક્યો છે.
સંજુ સેમસનઃ
શાનદાર ફોર્મમાં રમી રહેલો સંજુ સેમસન રન બનાવવાના મામલે ચોથા નંબર પર આવી ગયો છે. તેણે બે મેચમાં ૮૫ના સર્વોચ્ચ સ્કોર સાથે કુલ ૧૫૯ રન બનાવ્યા છે.
સ્ટીવ સ્મિથઃ રાજસ્થાનના કેપ્ટન સ્ટીવ સ્મિથે ગઈ કાલે પંજાબ સામે શાનદાર અર્ધસદી ફટકારી. બે મેચમાં ૧૧૯ રન બનાવીને આ યાદીમાં તે પાંચમા સ્થાને પહોંચી ગયો છે.
પોઇન્ટ ટેબલઃ
ગઈ કાલે રોમાંચક જીત સાથે રાજસ્થાન રોયલ્સની ટીમે આઇપીએલ પોઇન્ટ ટેબલમાં હનુમાન કૂદકો લગાવતા બીજું સ્થાન હાંસલ કરી લીધું હતું. પ્રથમ સ્થાન પર દિલ્હી કેપિટલ્સની ટીમ છે. દિલ્હીની ટીમે બે મેચમાં બે વિજય અને +૧.૧૦૦ના નેટ રનરેટ સાથે પ્રથમ સ્થાન પર કબજો જમાવ્યો છે. રાજસ્થાન રોયલ્સની ટીમ બે મેચમાં બે વિજય અને +૦.૬૧૫ના નેટ રનરેટ સાથે બીજા સ્થાને પહોંચી ગઈ છે. કિંગ્સ ઈલેવન પંજાબ ત્રણ મેચમાં એક જીત અને બે પરાજય સાથે ત્રીજા સ્થાને છે. તેનો નેટ રનરેટ +૧.૪૯૮ છે. મુંબઈ ઇન્ડિયન્સ બે મેચમાં એક જીત અને એક હાર સાથે ચોથા સ્થાન પર છે. તેનો નેટ રનરેટ +૦.૯૯૩ છે. કોલકાતાની ટીમ બે મેચમાં એક વિજય અને એક પરાજય સાથે પાંચમા સ્થાને છે. તેનો નેટ રનરેટ -૦.૭૬૭ છે. ધોનીના નેતૃત્વવાળી સીએસકેની ટીમ ત્રણ મેચમાં માત્ર એક જ મેચ જીતી શકી અને બે મેચમાં હારનો સામનો કરવો પડ્યો છે. છઠ્ઠા સ્થાને રહેલી સીએસકેનો નેટ રનરેટ -૦.૮૪૦ છે. આરસીબી બે મેચમાં એક વિજય અને એક પરાજય સાથે સાતમા સ્થાને છે. તેનો નેટ રનરેટ -૨.૧૭૫ છે. જ્યારે આ યાદીમાં સૌથી છેલ્લા એટલે કે આઠમા સ્થાન સનરાઇઝર્સ હૈદરાબાદ છે. આ ટીમ અત્યાર સુધીમાં બે મેચ રમી છે અને બંને મેચમાં તેનો પરાજય છે. તેનો નેટ રનરેટ -૦.૭૩૦ છે.