ઈન્ડિયન પ્રીમિયર લીગની આગામી સિઝન પહેલા અમુક ટીમે મોટા ફેરફારનો નિર્ણય કર્યો છે. જેને પગલે બે ટીમોએ તો પોતપોતાના કેપ્ટનોને રિટેન જ કર્યા નથી. આ ખેલાડીઓને કરોડોની રકમ ખર્ચ કરીને ટીમમાં સામેલ કરવામાં આવ્યાં હતા. પરંતુ હવે તેમને રિલીઝ કરવાનો નિર્ણય કરવામાં આવ્યો છે.
IPLની આગામી સિઝન પહેલા થશે મોટા ફેરફાર
બે ટીમોએ પોતપોતાના કેપ્ટનોને રિટેન જ કર્યા નથી
મિની ઑક્શન પહેલા આ ખેલાડીને બહાર કરવામાં આવ્યો
મયંક અગ્રવાલે ક્રિકેટના મેદાન પર ફટકારી ટ્રીપલ સદી
રિલીઝ કરવામાં આવેલ એક ખેલાડી તો એવો છે, જેનો 14 કરોડ રૂપિયા ખર્ચ કરીને ટીમમાં સમાવેશ કરવામાં આવ્યો હતો. તો બીજો ખેલાડી ક્રિકેટના મેદાન પર નોટઆઉટ રહીને ટ્રીપલ સદી ફટકારી ચૂક્યો છે. ખેલાડીઓને રિલીઝ-રિટેન કરીને મોટા ફેરફાર કરનારી ટીમોની યાદીમાં પંજાબ કિંગ્સનુ નામ પણ જોડાયેલુ છે. મિની ઑક્શન પહેલા એક એવા ખેલાડીને બહાર કરવામાં આવ્યો છે, જે ક્રિકેટના મેદાન પર ટ્રીપલ સદી ફટકારી ચૂક્યો છે. એટલું જ નહીં, આ બેટર ભારતીય ટેસ્ટ ટીમ માટે બેવડી સદી પણ ફટકારી ચૂક્યો છે. જેનુ નામ છે, મયંક અગ્રવાલ.
મયંક માટે 12 કરોડ કર્યા હતા ખર્ચ
અત્યાર સુધી એક પણ વખત ચેમ્પિયન નહીં થનારી ટીમ પંજાબ કિંગ્સે આઈપીએલ 2023 પહેલા મોટો ફેરફાર કર્યો છે. મયંક અગ્રવાલને કેપ્ટનશિપ પદેથી હટાવીને અનુભવી ઓપનર શિખર ધવનને ટીમનુ સુકાન સોંપવામાં આવ્યું. એટલું જ નહીં, જ્યારે મંગળવારે સાંજે ટીમે રિટેન ખેલાડીઓની યાદી જાહેર કરી તો તેમાં મયંકનુ નામ નહોતુ. મયંકને પહેલાની એડિશન માટે 12 કરોડ રૂપિયા ખર્ચ કરી ટીમમાં સામેલ કરવામાં આવ્યો હતો.
શિખર ધવનને મળી કેપ્ટનશિપ
હવે પંજાબ ટીમની કેપ્ટનશિપ અનુભવી ઓપનર શિખર ધવનને સોંપવામાં આવી છે. ટીમે આઈપીએલ મિની ઑક્શન પહેલા પોતાના પૂર્વ કેપ્ટન મયંક સહિત કુલ 9 ખેલાડીઓને રિલીઝ કરવાનો નિર્ણય કર્યો. 16 ખેલાડીઓને યથાવત રાખ્યા. ક્રિકેટના મેદાનમાં ગબ્બરથી મશહૂર શિખર ધવન ભારતીય ટીમની કેપ્ટનશિપ સંભાળી ચૂક્યા છે.
14 કરોડનો વિલિયમસન પણ બહાર
પૂર્વ ચેમ્પિયન સનરાઈઝર્સ હૈદ્રાબાદે તેના હાલના કેપ્ટન કેન વિલિયમસનને રિટેન નહીં કરવાનો નિર્ણય કર્યો. વિલિયમસનની આગેવાનીમાં હૈદ્રાબાદે આઈપીએલ 2022માં ખૂબ ખરાબ પ્રદર્શન કર્યુ અને ટીમ પ્લેઓફ સુધી પણ પહોંચી શકી નથી. જેને પગલે ફ્રેન્ચાઈઝીએ આ મોટુ પગલુ ઉઠાવ્યુ છે. હવે વિલિયમસનની જગ્યાએ ભુવનેશ્વર કુમારને કેપ્ટન બનાવાઈ શકે છે. વિલિયમસનને પહેલાની એડિશન માટે 14 કરોડ રૂપિયાનો ભારે રકમ ખર્ચ કરી રિટેન કરવામાં આવ્યો હતો.