IPL 2020 / અમદાવાદમાં IPLની ટિકિટોની કાળાબજારીનો VIDEO આવ્યો સામે, 800 વાળીનો ભાવ જાણીને ગુસ્સો આવી જશે

• IPLની ટિકિટોની કાળાબજારી
• 800ની ટિકિટના 8 હજાર 
• ભાવતાલ કરતા હોવાનો વીડિયો

IPL ટુર્નામેન્ટ અંતિમ તબક્કામાં છે અને એક ક્વોલીફાયર અને એક ફાઈનલ એમ બે જ મેચ બાકી છે. બંને મેચ અમદાવાદમાં યોજાવાની છે ત્યારે શહેરમાં જબરદસ્ત ક્રિકેટ ક્રેઝ સર્જાયો છે. ફાઈનલની ટિકિટ મેળવવા માટેની દોડધામની સાથોસાથ હોટલ બુકીંગ અને ફલાઇટ બુકીંગમાં પણ મોટો વધારો થયો છે. આજે જે ટીમ જીતશે તેની ગુજરાત ટાઈટન્સ સામે ફાઇનલ મેચ યોજાશે. આજની મેચ જોવા માટે પણ લોકો પડાપડી કરી રહ્યા છે. તો IPL 2022ની અંતિમ ઘડીએ ટિકિટોના કાળાબજારી પણ સામે આવી છે.

800ની ટિકિટના 3થી 8 હજાર 

IPLનો ગ્રાન્ડ ફાઈનલ મુકાબલો આગામી તા. 29મીએ પ્રથમ વખત અમદાવાદમાં નરેન્દ્ર મોદી સ્ટેડીયમ ખાતે યોજાવાનો છે. સવા લાખ દર્શકોની ક્ષમતા ધરાવતું સૌથી મોટું સ્ટેડીયમ છે. 29મી પૂર્વે 27મી એટલે કે આજે ક્વોલીફાયર મેચ પણ રમાવાનો છે. ત્યારે 500થી 20,000 રુપિયા સુધીની ટિકિટો માત્ર 36 કલાકમાં જ વેચાઈ ગઇ હતી. ત્યારે હવે કેટલાક ક્રિકેટ રસિકો કોઇપણ સંજોગોમાં મેચ જોવા માટે આતુર હોય છે. જેને લઇને તેઓ ટિકિટો મેળવવાના પ્રયત્નો કરે છે. ત્યારે મેચની અંતિમ ઘડીએ કેટલાક કાળાબજારીયા ટિકિટો વેચતા હોવાનું સામે આવી રહ્યું છે. રૂપિયા 800ની ટિકિટ 3 હજારથી લઇને 8 હજારના ભાવે વેચાઇ રહી છે. તો 1 જે ટિકિટોના ભાવતોલ કરતો વીડિયો સામે આવ્યો છે. ટિકિટ માટે સ્ટેડિયમમાં ફોન કરતા હોવાની વાતચીત સામે આવી છે.

મેચ ટિકિટની કાળા બજારી કરતો એક શખ્સ ઝડપાયો

કાળા બજારીયાઓ પર પોલીસ ચાંપતી નજર રાખી રહી છે. મેચ ટિકિટની કાળા બજારી કરતો એક શખ્સ ઝડપાયો છે. ભાવ કરતા ડબલ ભાવે ઓનલાઈન કાળા બજારી કરતા આરોપી અનુરાગ ગલીયાને ઝોન-2 LCBએ ઝડપ્યો હતો. આરોપી ગોતાના શાયોના તિલકનો રહેવાસી છે. તેની પાસેથી રૂ.2500ના ભાવની 4 ટિકિટ પોલીસે કબ્જે કરી છે. રૂ.10 હજારની ટિકીટો 16 હજારના ભાવે શખ્સ વેચતો હતો.

આઈપીએલમાં ક્રિકેટ અને બોલીવુડનું થશે સંગમ

આઈપીએલના આ બે મહત્વપૂર્ણ હાઈવોલ્ટેજ મુકાબલા પૂર્વે જબરદસ્ત ક્રિકેટ ક્રેઝ સર્જાયો છે. કારણ કે તેમાં ક્રિકેટ અને બોલીવુડનું સંગમ થવાનું છે. ફાઈનલ મેચ પૂર્વે 50 મીનીટનો પૂર્ણાહુતિ સમારોહ યોજાવાનો છે જેમાં 300 કલાકારો ભાગ લેવાના છે. એ.આર. રહેમાન અને રણવીરસિંહ ક્લોઝીંગ સેરેમનીમાં સામેલ થવાના છે.  આ ઉપરાંત આમિર ખાન પણ પોતાની આગામી ફિલ્મના પ્રમોશન માટે હાજર રહે તેવી શક્યતા છે. અન્ય કેટલાંક બોલીવુડ કલાકારો પણ હાજર રહેશે. એ.આર.રહેમાન ભારતીય ક્રિકેટનાં 75 વર્ષ અને આઝાદીના 75 વર્ષના ઉપલક્ષ્યમાં ખાસ સંગીત પીરસશે. રણવીરસિંહ ડાન્સ પરફોર્મન્સ આપશે. તેની કોરિયોગ્રાફી શ્યામક દાવર દ્વારા કરવામાં આવી છે. ફાઈનલમાં પ્રથમ જ વખત આઈપીએલ રમનારી ગુજરાત ટાઈટન્સ ફાઈનલમાં પહોંચી હોવાથી ગુજરાતી ક્રિકેટ પ્રસંશકોનો આનંદ બેવડાયો છે. તો મેચમાં કેન્દ્રીય ગૃહમંત્રી અમિત શાહ પણ હાજરી આપશે.

હોટલ અને ફ્લાઇટમાં પણ ધસારો

દેશભરમાંથી ક્રિકેટ પ્રશંસકો મેચ જોવા માટે અમદાવાદ આવી ગયા છે. જેના પરિણામે હોટલ અને ફ્લાઈટમાં પણ ધસારો છે. હોટલ અને ફલાઈટ ભાડા પણ ઘણા વધી ગયા છે. અમદાવાદ આવક-જાવકના વિમાની ભાડામાં મોટો વધારો થયો છે. મુંબઈ-દિલ્હી-બેંગ્લોર-જયપુર અને લખનૌનાં ટિકિટ ભાડા લગભગ ડબલ થઇ ગયા છે. 11,500થી 16,500ના ટીકીટ ભાડા થયા છે. એમ માનવામાં આવે છે કે સવા લાખ દર્શકોની ક્ષમતા ધરાવતા નરેન્દ્ર મોદી સ્ટેડીયમમાં ફાઈનલ જોવા આવનારા 25,000 જેટલા દર્શકો ગુજરાત બહારના હશે. ફલાઈટ ભાડા ઉપરાંત હોટલ ભાડામાં પણ વધારો થઇ ગયો છે.

સારી હોટલનાં રુમ ભાડા 10,000 સુધી પહોંચી ગયા છે. વિકએન્ડમાં હોટલો કુલ ક્ષમતાના 90 ટકા સુધી ભરાઈ જાય તેવું માનવામાં આવી રહ્યું છે. ફાઈનલ મેચની ટીકીટો હાઉસફૂલ થઇ ગઇ છે. જેના પરિણામે ટીકીટ વિના રહી ગયેલા પ્રશંસકો તે મેળવવા માટે દોડધામ કરતાં રહ્યા છે. હોટલ કોટ યાર્ડના જનરલ મેનેજર દિપપ્રિત બિંદ્રાએ કહ્યું કે મોટાભાગની હોટલો વિકએન્ડ માટે ફૂલ થઇ ગઇ છે. મોટાભાગનાં લોકો આઈપીએલ જોવા આવનારા જ છે. સુત્રોએ એમ જણાવ્યું છે કે મોટી ડીમાંડ નિકળી પડતા હોટલ સંચાલકોએ રુમના ભાડામાં 25 થી 35 ટકા સુધીનો વધારો કરી દીધો છે.