IPL 2022 / આવતા વર્ષે તમે 'ગુજરાત'માં આવી શકો છો : હાર્દિકે જુઓ કોને કરી ઑફર, VIDEO કર્યો શેર

• ગુજરાત ટાઈટન્સએ શેર કર્યો એક વિડીયો 
• મુંબઈ માટે હાર્દિકે 1400થી વધુ રન બનાવ્યા અને 42 વિકેટ ઝડપી
• હાર્દિકે પોતાની જૂની ટીમ અને જૂના સાથી ખેલાડીને યાદ કર્યા 

ગુજરાત ટાઇટન્સના કેપ્ટન હાર્દિક પંડ્યા શુક્રવારે સાંજે તેની જૂની ફ્રેન્ચાઇઝી મુંબઇ ઇન્ડિયન્સ સામે ટકરાશે. આ મેચ બ્રેબન સ્ટેડિયમમાં રમાવાની છે. આ મેચ હાર્દિક માટે ખાસ છે કારણ કે તે આઇપીએલની સાત સિઝન મુંબઇ ઇન્ડિયન્સ સાથે રમી ચૂક્યો છે. આ દરમિયાન ટીમ 4 વખત ipl જીતવામાં સફળ રહી હતી. આ મેચોમાં હાર્દિકની ભૂમિકા પણ મહત્વની રહી હતી. તેણે મુંબઈ માટે 1400થી વધુ રન બનાવ્યા હતા અને 42 વિકેટ પણ લીધી હતી. જોકે તે આ સિઝનમાં પહેલી વખત પોતાની જૂની ટીમ સામે રમશે. જ્યારે ગુજરાત પોઈન્ટ ટેબલમાં ટોચના સ્થાને છે તેની સામે પાંચ વખતની ચેમ્પિયન મુંબઈની ટીમ 10માં ક્રમે છે અને તેઓ પ્લેઓફની રેસમાંથી બહાર થઈ ગઈ છે.

તને ખબર નથી, તું આવતા વર્ષે અમારી પાસે આવી શકે છેઃ હાર્દિક પંડ્યા
આ મેચ પહેલા હાર્દિકે મુંબઇ ઇન્ડિયન્સ સાથેની પોતાની સફળતાને યાદ કરી હતી. ગુજરાત ટાઇટન્સ દ્વારા તેના ટ્વિટર એકાઉન્ટ પરથી એક વીડિયો શેર કરવામાં આવ્યો છે. આ વીડિયોમાં હાર્દિકે ખુલાસો કર્યો હતો કે, તાજેતરમાં જ તેણે પોતાના જૂના સાથી ખેલાડી અને મુંબઈ ઈન્ડિયન્સના દિગ્ગજ ઓલરાઉન્ડર કાઇરન પોલાર્ડ સાથે વાતચીત કરી હતી. તેમાં તેણે પોલાર્ડને મજાકમાં કહ્યું હતું કે, "તને ખબર નથી, તું આવતા વર્ષે અમારી પાસે આવી શકે છે. મારી એ જ ઈચ્છા છે. પણ હું જાણું છું કે એવું કદી શક્ય બનવાનું નથી."

A tale of two colours - blue and golden - in the words of #PapaPandya 😍

📽 Captain relives his MI memories before the clash of the day #GTvMI@hardikpandya7 #SeasonOfFirsts #AavaDe pic.twitter.com/4ZNe7Gh69v

— Gujarat Titans (@gujarat_titans) May 6, 2022

ત્રણ છગ્ગા ફટકારીને પહેલીવાર મેં સફળતાનો સ્વાદ ચાખ્યોઃ હાર્દિક પંડ્યા
હાર્દિકે ગુજરાત ટાઇટન્સ દ્વારા શેર કરવામાં આવેલા વીડિયોમાં વધુમાં જણાવ્યું હતું કે, "મુંબઈ સાથેની મારી સફર યાદગાર રહી છે."મેં મારી જાતને હંમેશા બ્લૂ અને ગોલ્ડન જર્સીમાં જોઈ છે. પરંતુ હું મારા હોમ સ્ટેટ સાથે પણ બ્લુ અને ગોલ્ડન જર્સીમાં છું, જે મારા માટે વધુ ખાસ બની જાય છે. મને આજે પણ યાદ છે કે કેવી રીતે ચેન્નઈ સુપર કિંગ્સ સામેની મેચમાં અમારે 2 ઓવરમાં 32 રનની જરુર હતી અને મેં ત્રણ છગ્ગા ફટકારી ટીમને જીત અપાવી હતી. ત્યારે પહેલીવાર મેં સફળતાનો સ્વાદ ચાખ્યો. મુંબઈ ઈન્ડિયન્સ સાથેની મારી ઘણી યાદો છે, અને અત્યાર સુધી રહી છે."

આ સિઝનમાં અત્યાર સુધી પોલાર્ડનું પ્રદર્શન સારું રહ્યુ નથી. ગત મહિને જ આંતરરાષ્ટ્રીય ક્રિકેટમાંથી સંન્યાસ લેનારા પોલાર્ડે નવ મેચમાં 20થી ઓછી એવરેજથી માત્ર 125 રન જ બનાવ્યા છે.