ચેન્નઈ સુપરકિંગ્સ ભલે ચાર વખત ચેમ્પિયન બન્યું હોય, પરંતુ આઈપીએલના પહેલા મુકાબલામાં આ ટીમ ધરાશાયી થતી નજરે પડે છે. શનિવારે રાત્રે પણ કંઇક એવું જ જોવા મળ્યું. આઈપીએલ 2022ના ઓપનિંગ મુકાબલામાં કોલકાતા નાઇટરાઇડર્સે ચેન્નઈ સુપર કિંગ્સને 6 વિકેટથી હરાવીને પોતાના મિશનની શરૂઆત જીતથી કરી. ચેન્નઇ તરફથી પૂર્વ કેપ્ટન મહેન્દ્રસિંહ ધોનીની ધમાલ જોવા મળી, પરંતુ આ જીત ન અપાવી શકી.
કોલકાતાએ સરળતાથી લક્ષ્ય હાંસલ કરી લીધો
132 રનના આસાન ટારગેટના જવાબમાં 2 વારની ચેમ્પિયન કેકેઆરએ 18.3 ઓવરમાં 9 બોલ રહેતા 6 વિકેટથી મુકાબલો પોતાના નામે કર્યો. અજિંગ્ય રહાણે (44) અને વેંકટેશ અય્યર (16)એ 43 રનની ભાગીદારી કરી. ત્યારબાદ નીતીશ રાણા(21), સૈમ બિલિંગ્સ(20)એ પણ સારી શરૂઆત કરી. અંતમાં કેપ્ટન શ્રેયસ અય્યર(25), શેલ્ડન જેક્સન(3)એ ક્રીઝ પર ટકીને પોતાની ટીમને જીત અપાવી. કોલકાતાએ 18.3 ઓવરમાં જ 133/4 સ્કોર કર્યો.
ચેન્નઈ સુપર કિંગ્સની શરૂઆત કોલકાતા નાઇટ રાઇડર્સ સામે ખુબ જ ખરાબ રહી. પહેલી જ ઓવરમાં ઋતુરાજ ગાયકવાડ(0)ને ગુમાવ્યા બાદ ચેન્નઈ વાપસી ન કરી શકી. ચેન્નઇ તરફથી ડેવોન કોન્વે(3), રોબિન ઉથપ્પા(28), અંબતિ રાયડૂ(15), રવિન્દ્ર જાડેજા(26), શિવમ દુબે(3) રન બનાવ્યા. એમ.એસ. ધોનીએ પોતાની 39 બોલમાં 50 રનની ઇનિંગ રમીને ચેન્નઈને 61-5થી 131-5 પર પહોંચાડ્યું.
રવિન્દ્ર જાડેજાની કેપ્ટનશિપની શરૂઆત સારી ન રહી
રવિન્દ્ર જાડેજા માટે કેપ્ટન તરીકે આ પહેલી મેચ હતી, પરંતુ તેમને હારનો સામનો કરવો પડ્યો. આઈપીએલમાં 200 મેચ રમ્યા બાદ રવિન્દ્ર જાડેજા કોઇ ટીમની કેપ્ટનશીપ કરનારા પહેલા ખેલાડી બન્યા. પહેલી મેચમાં કેટલીક વસ્તુઓ રહી, જે ચેન્નઈ સુપર કિંગ સમાટે સારી ન રહી. જેમાં બોલિંગ ચેન્જ, બેટિંગ જેવા પોઇન્ટ રહ્યા.