IPL ચાહકો માટે સારા સમાચાર છે. મીડિયા અહેવાલો અનુસાર ટી-20 વર્લ્ડકપ, 2020 રદ થઈ શકે છે અને તેના સ્થાને IPLનું આયોજન હવે લગભગ નિશ્ચિત માનવામાં આવી રહ્યું છે, પરંતુ સવાલ એ છે કે IPLનું આયોજન થશે ક્યાં? કોરોનાને કારણે ભારતમાં તો આઇપીએલનું આયોજન થઈ શકે તેમ નથી. યુએઈ અને શ્રીલંકા બાદ હવે ન્યૂઝીલેન્ડે IPL યોજવાની ઓફર કરી છે.
IPL માટે UAE સૌથી આગળ
ન્યૂઝીલેન્ડ IPL યજમાન બનવા તૈયાર
આમ છતાં યુએઈ આ રેસમાં સૌથી આગળ છે, કારણ કે ભારતની નજીક છે અને ભૂતકાળમાં પણ અહીં IPLની કેટલીક મેચનું આયોજન થઈ ચૂક્યું છે. BCCI સપ્ટેમ્બરના અંતથી નવેમ્બર દરમિયાન IPL યોજવાની શક્યતાઓ પર વિચારણા કરી રહી છે. બોર્ડનો પહેલો વિકલ્પ ભારતમાં જ આ આયોજન કરવા પર રહેશે, પરંતુ કોરોનાના વધી રહેલા કેસને જોતાં આ સંભવ લાગતું નથી.
અમેરિકા અને બ્રાઝિલ બાદ સૌથી વધુ કેસ ભારતમાં જ છે. બોર્ડના એક સિનિયર અધિકારીએ કહ્યું, ''યુએઈ-શ્રીલંકા બાદ હવે ન્યૂઝીલેન્ડે આઇપીએલ યોજવાની ઓફર કરી છે. અમે બધા સંબંધિત પક્ષો સાથે મળીને નિર્ણય કરીશું.''
જો IPL વિદેશમાં યોજાય તો UAE યજમાનીની રેસમાં સૌથી આગળ છે. ન્યૂઝીલેન્ડ ભલે કોરોનામુક્ત થઈ ગયું હોય, પરંતુ ભારત અને ન્યૂઝીલેન્ડના ટાઇમ ઝોનમાં સાડા સાત કલાકનો ફરક છે. જો મેચ બપોરે 12:30 વાગ્યે શરૂ થાય તો તેને દર્શકો બહુ ઓછા મળી શકે. હેમિલ્ટનથી ઓકલેન્ડ ઉપરાંત વેલિંગ્ટન, ક્રાઇસ્ટચર્ચ, નેપિયર અથવા ડુનેડિન પ્લેનથી જ જવું-આવવું પડે છે. આથી જ એવું મનાય છે કે આઇપીએલનું આયોજન યુએઈમાં થઈ શકે છે.