ઈન્ડિયન પ્રીમિયર લીગની દરેક મેચમાં રેકોર્ડ્સ બને છે અને તૂટતા રહે છે. ત્યારે આ ટૂર્નામેન્ટની 13મી સીઝનના પહેલાં જ બોલ પર રોહિત શર્માએ એવું પરાક્રમ કરી બતાવ્યું જે આઈપીએલની છેલ્લી 12 સીઝનમાં જોવા મળ્યું નથી.
રોહિત શર્માએ બનાવ્યો આ રેકોર્ડ
હકીકતમાં, રોહિત શર્માએ આઈપીએલ 2020ના પહેલાં જ બોલ પર જબરદસ્ત ચોગ્ગાની શરૂઆત કરી હતી. રોહિત શર્માએ દીપક ચહરના બોલ પર ગજબ કવર ડ્રાઇવ ફટકારી. તમને જણાવી દઈએ કે, આઈપીએલમાં આ પહેલીવાર છે જ્યારે ટૂર્નામેન્ટના પહેલાં જ બોલ પર ચોગ્ગો ફટકાર્યો હોય. રોહિત શર્મા આ સિદ્ધિ મેળવનારો પહેલો ખેલાડી છે.
જોકે, રોહિત શર્મા સારી શરૂઆતને મોટી ઇનિંગમાં પરિવર્તિત કરી શક્યો નહીં. રોહિત શર્માને પિયુષ ચાવલાના બોલ પર પેવેલિયન પરત ફરવું પડ્યું. મુંબઇનો કેપ્ટન માત્ર 12 રન બનાવીને આઉટ થયો હતો. રોહિત શર્માએ પિયુષ ચાવલાના બોલ પર મિડ ઓફના ઉપરથી મારવાનો પ્રયાસ કર્યો હતો પરંતુ તે સેમ કર્રનથી કેચ આઉટ થઈ ગયો. રોહિત શર્માના આઉટ થયા પછી તરત જ ક્વિન્ટન ડીકોક પણ તેનું ધ્યાન ગુમાવ્યું અને બે બોલ પછી તે પણ આઉટ થયો. ડીકોકે 33 રન બનાવ્યા, તેને સેમ કર્રને આઉટ કર્યો.
રોહિત શર્માએ પ્લેઈંગ ઈલેવનમાં ચોંકાવનારા ફેરફાર કર્યા
ચેન્નઈ સુપર કિંગ્સ સામે રોહિત શર્માએ મુંબઈ ઈન્ડિયન્સની પ્લેઇંગ ઈલેવનમાં ચોંકાવનારા બદલાવ કર્યા છે. રોહિત શર્માએ મિડલ ઓર્ડરમાં ઝારખંડના બેટ્સમેન સૌરભ તિવારીને જગ્યા આપી. રોહિત શર્માના આ નિર્ણયને જોઈ બધાં સ્તબ્ધ થઈ ગયા. જોકે, સૌરભ તિવારી કેપ્ટનના વિશ્વાસ પર ખરો ઉતર્યો અને તેણે 42 રનની નિર્ણાયક ઈનિંગ રમી હતી. જાડેજાના બોલ પર સૌરભ તિવારીએ સિક્સર ફટકારવાનો પ્રયાસ કર્યો પણ ફાફ ડુપ્લેસીએ તેની લોન્ગ ઓવર બાઉન્ડ્રી પર શાનદાર કેચ પકડ્યો. તમને જણાવી દઈએ કે આઈપીએલ 2020નો પહેલો સિક્સર સૌરભ તિવારીએ જ ફટકાર્યો.