IPLની 12મી સિઝન શરૂ થઇ ત્યારથી મહેન્દ્ર સિંહ ધોનીના કૂલ અંદાજના લોકો ફેન બની રહ્યા છે. ક્રિકેટના મેદાનમાં કેપ્ટન કૂલ તરીકે જાણીતો બનેલા ધોની આમ તો ઘણીવખત દિકરી ઝિવા સાથે મસ્તી કરતો જોવા મળે છે. જોકે હાલમાં જ તેનો વધુ એક વીડિયો વાયરલ થયો છે. જેમાં તે પજાંબની સામેની મેચ પછી પોતાની ટીમના સાથી શેન વોટસન અને ઇમરાન તાહિરના દિકારાઓ સાથે રેસ લગાવતો જોવા મળી રહ્યો છે.
ચેન્નાઇ સુપરકિંગ્સના ઑફિશ્યલ ટ્વિટર એકાઉન્ટ પર પજાંબ અને ચેન્નાઇની મેચ પછીનો વીડિયો પોસ્ટ કર્યો હતો. વીડિયોમાં જોઇ શકાય છે કે, વોટસન અને તાહિરના દિકરા રેસ લગાવ્યા બાદ પાછા આવે છે અને ફરીથી એક સાથે રેસ લગાવવા તૈયાર થઈ રહ્યા છે. એવામાં પાછળથી ધોની દોડતો આવે છે અને તેમનાથી આગળ નીકળી જાય છે. આ જોઇને બંને બાળકો પણ તેની પાછળ દોડવા લાગે છે. થોડી જ વારમાં વોટસનનો દીકરો બંનેથી આગળ નીકળી જાય છે. તરત ધોની તાહિરના દિકારાને ઉચકીને પાછો ભાગવા લાગે છે. આ જોઈને બંને ખેલાડીઓ ખડખડાટ હસવા લાગે છે. વોટસનનો દીકરો ફરીથી રેસ કરવા માટે ‘વન્સ મોર’ બોલે છે પરંતુ ધોની ‘નો’ કહીને જતો રહે છે.
ઉલ્લેખનીય છે કે ધોની પોતાના કૂલ અંદાજ માટે જાણીતો છે. બાળકો સાથે તે પણ બાળક બની જાય છે. હાલમાં જ મુંબઈ સામેની મેચમાં એક વૃદ્ધ મહિલા ફેન સાથે ધોનીનો વીડિયો વાયરલ થઇ હતો, ત્યારે ફરીથી મેદાન પર આવો મસ્તીભર્યો ધોનીનો અંદાજ જોઇને તેના ચાહકો પણ મજા લઇ રહ્યા છે.