RCBના ચાહકો હાલ પોઇન્ટ ટેબલના ઈતિહાસ અને ભૂગોળ માપી રહ્યા છે. એ વાત સમજવાની કોશિશ કરી રહ્યા છે કે શું ભૂતકાળમાં કોઈ ટીમ છ પરાજય બાદ પ્લેઓફમાં પહોંચી છે કે નહીં? આવા ચાહકોની જાણકારી માટે અહીં બતાવી દઈએ કે લીગ મેચોમાં સતત પાંચ પરાજય બાદ મુંબઈ ઇન્ડિયન્સ ૨૦૧૪માં પ્લેઓફમાં પહોંચી હતી.
જો તમે રોયલ ચેલેન્જર્સ બેંગલુરુના 'હાર્ડકોર ફેન' છો તો કદાચ હજુ પણ તમે આંકડા કાગળ પર લખશો કે લીગમાં આઠ મેચ રમવાની બાકી છે અને એ આઠેય મેચ RCB જીતી જાય તો પ્લેઓફમાં પહોંચી શકાય, પરંતુ બધાં એ સારી રીતે જાણે છે કે એવું બનવાનું નથી.
વિરાટ કોહલીની ટીમ જે સ્તરનું પ્રદર્શન IPLમાં હાલ કરી રહી છે તે જોતાં તેને પ્રથમ જીત મળવી પણ મુશ્કેલ લાગી રહી છે. જો આવી સ્થિતિ હોય તો પછી આઠેય મેચ કેવી રીતે જીતી શકે? સચ્ચાઈ એ જ છે કે પાછલી તમામ સિઝનની જેમ આ વખતે પણ RCBની ટીમ ખાલી હાથે જ રહેવાની છે. અલબત્ત, તમામ સિઝન કરતાં ઘણી ખરાબ રીતે આ વખતે RCBની ટીમ ટૂર્નામેન્ટની બહાર ફેંકાશે. દિલ્હી સામે રમાયેલી મેચમાં પરાજય બાદ વિરાટ કોહલીએ પણ આ વાતનો સ્વીકાર કરી લીધો છે. મેચ બાદ તેણે જણાવ્યું હતું, ''હવે તણાવમાં રહેવાનો કોઈ ફાયદો નથી, કારણ કે તણાવમાં રહીને આગામી મેચમાં વધુ નુકસાન જ થવાનું છે. આથી વધુ સારું એ છે કે ટીમ રમતની મજા માણે.''
RCBના ચાહકો હાલ પોઇન્ટ ટેબલના ઈતિહાસ અને ભૂગોળ માપી રહ્યા છે. એ વાત સમજવાની કોશિશ કરી રહ્યા છે કે શું ભૂતકાળમાં કોઈ ટીમ છ પરાજય બાદ પ્લેઓફમાં પહોંચી છે કે નહીં? આવા ચાહકોની જાણકારી માટે અહીં બતાવી દઈએ કે લીગ મેચોમાં સતત પાંચ પરાજય બાદ મુંબઈ ઇન્ડિયન્સ ૨૦૧૪માં પ્લેઓફમાં પહોંચી હતી. એ ઉપરાંત ૨૦૧૫માં તો મુંબઈ ઇન્ડિયન્સે શરૂઆતની ચાર મેચમાં સતત પરાજય બાદ પણ ખિતાબ જીતી લીધો હતો, પરંતુ એ કહાણી ચાર અને પાંચ પરાજયની છે, છ હાર થોડી વધુ પડતી છે. સત્ય એ છે કે આ સિઝનમાં વિરાટની ટીમ સાથે કંઈ જ સારું નથી બન્યું. બેટ્સમેન તરીકે દુનિયાના બે સૌથી શાનદાર ખેલાડી-ડિવિલિયર્સ અને િવરાટ કોહલી એક પણ મોટી ઇનિંગ્સ રમી શક્યા નથી.
છ મેચમાં વિરાટે ૨૦૩ અને ડિવિલિયર્સે ૧૭૩ રન બનાવ્યા છે, જે આ બંને બેટ્સમેનોના કદના હિસાબથી ઘણા ઓછા છે. બોલિંગ ડિપાર્ટમેન્ટમાં પણ વિરાટની ટીમ સાવ વામણી પુરવાર થઈ છે. ચહલે વિકેટો જરૂર ઝડપી છે, પરંતુ રન પણ એટલા જ લૂંટાવ્યા છે.
ઇનિંગ્સની શરૂઆત કરવાનો વિરાટનો નિર્ણય પણ સકારાત્મક નથી રહ્યો. આ નિર્ણય એટલા માટે પણ ચોંકાવનારો હતો, કારણ કે તે IPLમાં નંબર ત્રણ પર શાનદાર બેટિંગ કરતો આવ્યો છે. હવે કદાચ RCBની ટીમની ગાડી જીતના પાટા પર ચડી પણ જાય તોય પ્લેઓફમાં પહોંચી શકે એવું લાગતું નથી.