વિવાદ / અશ્વિનના માંકડિંગના વિરોધમાં એન્ડરસનની વાહિયાત હરકત

થોડા દિવસ પહેલાં IPLની એક મેચમાં કિંગ્સ ઈલેવન પંજાબના કેપ્ટન આર. અશ્વિને રાજસ્થાનના બેટ્સમેન જોસ બટલરને 'માંકડિંગ' રનઆઉટ કરી દીધો ત્યારે ખૂબ વિવાદ સર્જાયો હતો. જોકે સમયની સાથે મામલો ઠંડો પડતો જતો હતો, પરંતુ લાગે છે કે ઈંગ્લેન્ડના ફાસ્ટ બોલર જેમ્સ એન્ડરસનને વિવાદ ખતમ થાય એ પસંદ પડ્યું નહીં. અશ્વિનના માંકડિંગ રનઆઉટના વિરોધમાં એન્ડરસનનો એક વિચિત્ર વીડિયો સામે આવ્યો છે.

વીડિયોમાં જેમ્સ એન્ડરસન અશ્વિનની એક તસવીર સાથે વાહિયાત હરકત કરતો જોવા મળી રહ્યો છે. અશ્વિનની તસવીરને એન્ડરસર પેપર કટિંગ મશીનમાં નાખીને ગાજર મૂળાની જેમ કાપતો નજરે પડી રહ્યો છે. વીડિયોમાં કોઈ શખસનો અવાજ પણ સાંભળવા મળે છે, જે કહી રહ્યો છે કે, ''એન્ડરસન અશ્વિનની તસવીરને તેણે IPLમાં કરેલા વ્યવહારને કારણે કાતરી રહ્યો છે.'' ૩૧ સેકન્ડના આ વીડિયોમાં જેમ્સ એન્ડરસન ઘણી ખુશી સાથે આ હરકત કરતો નજરે પડી રહ્યો છે. એન્ડરસનની આ વાહિયાત હરકતની સોશિયલ મીડિયા પર જોરદાર ટીકા થઈ રહી છે.

EXCLUSIVE: @jimmy9 give us his unique take on @josbuttler’s controversial run out last week...

More rows should be settled like this.

Full story on this week’s #Tailenders https://t.co/YOQ4PMSwiu pic.twitter.com/hYCPpdSqJm

— Greg James (@gregjames) March 31, 2019

ઉલ્લેખનીય છે કે રાજસ્થાન રોયલ્સ અને કિંગ્સ ઈલેવન પંજાબ વચ્ચે ગત તા. ૨૫ માર્ચે રમાયેલી મેચમાં એક ઘટના બની હતી. પંજાબના કેપ્ટન અશ્વિને માંકડિંગ રનઆઉટ કરી દીધો હતો. અશ્વિન બોલ ફેંકવા માટે તૈયાર હતો. તે બોલ ફેંકે તે પહેલાં બેટ્સમેન જોસ બટલર ક્રીઝની બહાર નીકળી ગયો. અશ્વિને તેને આઉટ કરતા પહેલાં કોઈ જાતની ચેતવણી આપી નહીં અને સીધો આઉટ કરી દીધો. બટલર એ સમયે તોફાની ઇનિંગ્સ રમી રહ્યો હતો. તેના આઉટ થઈ ગયા બાદ રાજસ્થાનની ટીમ એ મેચ હારી ગઈ હતી.