એપલ તેના આઇફોન સહિતના ડિવાઇસ સૌથી સલામત હોવાનો દાવો કરતું હોય છે. જોકે છેલ્લા કેટલાક સમયમાં એપલની ઓએસમાં અનેક પ્રકારના સિકયુરિટીના છીંડા બહાર આવ્યા છે. થોડા સમય પહેલા ઓસ્ટ્રેલિયાના એક ટીનેજરે એપલના સર્વરમાં ધુસીને ડેટા કોપી કરતા ખળભળાટ મચી ગયો હતો.
હવે ગુગલે આઈફોન અંગે ચોંકાવનારો ખુલાસો કર્યો છે. ગુગલના સિકયુરિટી એકસપર્ટના દાવા મુજબ આઇફોન છેલ્લા લગભગ બે વર્ષથી હેકિંગનો શિકાર છે. હેકર્સ મેલિશિયસ વેબસાઇટ્સ દ્વારા આઇફોનમાંથી ડેટા ચોરી રહ્યા છે. આ ઉપરાંત યુઝર્સના ફોટા, તેનું લોકેશન જેવી સંવેદનશીલ માહિતી હેકર્સના હાથમાં પહોંચી રહી છે. હેકર્સ દ્વારા વોટ્સએપ, ટેલિગ્રામ અને જીમેલ એપને પણ કન્ટ્રોલ કરવામાં આવી રહી છે.
ગુગલના પ્રોજેક્ટ ઝીરો સિક્યુરિટી ટાસ્કફોર્સે એક બ્લોગ પોસ્ટ મારફતે આ માહિતી આપી છે. જોકે આ પોસ્ટમાં મેલિસિયસ વેબસાઇટ્સનાં નામ આપવામાં આવ્યાં નથી. સિકયુરિટી એકસપર્ટે એવો પણ દાવો કર્યો છે કે કે તેમની તપાસમાં દર અઠવાડિયે હજારો હેકિંગનાં કિસ્સા સામે આવ્યા છે. પ્રોજેક્ટ ઝીરોના ઇયાન બીઅરે કહ્યું, આવી વેબસાઇટની મુલાકાત લેવી એ ડિવાઇસ પર સામે ચાલીને હુમલો કરાવવા સમાન છે.
જો હેકર્સ સફળ થાય તો તમારા મોંઘા સ્માર્ટફોનમાં મોનિટરિંગના અન્ય ટુલ પણ દાખલ કરી શકે છે. આ ટુલ ઇન્સ્ટોલ થયા પછી ફાઇલોની ચોરી કરી શકે છે અને લાઇવ લોકેશન ડેટા અપલોડ કરી શકે છે. આ ટુલ યુઝરની જાણ બહાર ટેલિગ્રામ, વોટસએપ અને આઇમેસેજ જેવી એપ્લિકેશનનો ઉપયોગ કરી શકે છે.
આવી વેબસાઇટ આઇફોનમાં રહેલી ખામીઓનો લાભ લઈને તેને હેક કરવા માટે જ બનાવવામાં આવી છે. દર અઠવાડિયે હજારો લોકો આ પ્રકારની પ્રકારની વેબસાઇટની મુલાકાત લે છે અને હેકિંગનો ખેલ હજુ પણ ચાલી રહ્યો છે. ખુદ ગુગલની ગૂગલ હેંગઆઉટ્સ અને જીમેલને પણ તેની અસર થઈ છે. ગુગલના આ દાવા અંગે જોકે એપલે હજુ સુધી કોઇ પ્રતિક્રિયા આપી નથી.