ખેલ / 215 ભારતીય ખેલાડીઓ કોમનવેલ્થ ગેમ્સમાં વગાડશે ડંકો, રમશે આટલી રમતો, ભારતીય દળનું એલાન

• 2022ની કોમનવેલ્થ ગેમ્સ માટે ભારતીય દળનું એલાન
• 322 સભ્યોની ભારતીય ટુકડીની જાહેરાત
• 215 ખેલાડીઓ અને 07 અધિકારીઓ અને સપોર્ટ સ્ટાફ
• 28 જુલાઈથી 8 ઓગસ્ટ સુધી ઈંગ્લેન્ડમાં થશે કોમનવેલ્થ ગેમ્સ 

ભારતીય ઓલિમ્પિક સંઘ (આઈઓએ) એ શનિવારે કોમનવેલ્થ ગેમ્સ 2022 માટે 322 સભ્યોની ભારતીય ટુકડીની જાહેરાત કરી છે. ટીમમાં 215 ખેલાડીઓ ઉપરાંત 107 અધિકારીઓ અને સપોર્ટ સ્ટાફ છે. આ ગેમ્સનું આયોજન 28 જુલાઈથી 8 ઓગસ્ટ દરમિયાન ઈંગ્લેન્ડના બર્મિંઘમમાં થવાનું છે. 

215 athletes and 107 officials will represent @WeAreTeamIndia as part of 322 strong Contingent for @birminghamcg22 #weareteamindia #indianolympicassociation #commonwealthgames2022 #Birmingham2022 pic.twitter.com/kbNWGUJeQT

— Team India (@WeAreTeamIndia) July 16, 2022

સૌથી મજબૂત ટીમને કોમનવેલ્થમાં મોકલી રહ્યાં છીએ- રાજીવ મહેતા
આ પ્રસંગે આઇઓએના સેક્રેટરી જનરલ રાજીવ મહેતાએ જણાવ્યું હતું કે, "અમે અમારી સૌથી મજબૂત ટીમને કોમનવેલ્થ ગેમ્સમાં મોકલી રહ્યા છીએ. અમે શૂટિંગમાં ઘણા મજબૂત છીએ, પરંતુ તે આ વખતે આ રમતોનો ભાગ નથી. આ હોવા છતાં, અમને વિશ્વાસ છે કે આ વખતે ગત સિઝન કરતા વધુ સારો દેખાવ કરવામાં આવશે. મહેતાએ રમતવીરો અને ફેડરેશનોને ટેકો આપવા બદલ સરકારનો આભાર પણ માન્યો હતો. મહેતાએ જણાવ્યું હતું કે, "વડા પ્રધાનના નેતૃત્વ હેઠળની ભારત સરકારે રમતોને અભૂતપૂર્વ ટેકો આપ્યો છે અને ઓલિમ્પિક રમતોમાં અમારું શ્રેષ્ઠ પ્રદર્શન આની સાબિતી આપે છે.

નીરજ ચોપરા પર રહેશે ખાસ નજર

ટીમના કેટલાક અગ્રણી નામોમાં ઓલિમ્પિક મેડલ વિજેતા નીરજ ચોપરા, પીવી સિંધુ, મીરાબાઈ ચાનુ, લવલિના બોર્ગોહેન, બજરંગ પુનિયા અને રવિ કુમાર દહિયાનો સમાવેશ થાય છે. આ ઉપરાંત હાલની કોમનવેલ્થ ચેમ્પિયન મનિકા બત્રા, વિનેશ ફોગાટ તેમજ 2018ની એશિયન ગેમ્સમાં ગોલ્ડ મેડલ વિજેતા તજિન્દરપાલ સિંઘ તૂર, હિમા દાસ અને અમિત પંઘાલ પણ ટીમમાં સામેલ છે.

ભારતીય ખેલાડીઓ 19 રમતોમાં ભાગ લેશે

બોક્સિંગ એસોસિએશન ઓફ ઈન્ડિયા (બીએફઆઈ)ના વાઈસ પ્રેસિડેન્ટ રાજેશ ભંડારી ટીમના શેફ ડી મિશન (ટીમ હેડ) છે. ભારતીય ખેલાડીઓ 15 રમતો અને ચાર પેરા ગેમ્સમાં ભાગ લેશે. આ ટીમ પાસેથી બોક્સિંગ, બેડમિંટન, હોકી, વેઈટલિફ્ટિંગ, વિમેન્સ ક્રિકેટ અને કુસ્તી જેવી રમતોમાં સારો દેખાવ કરવાની અપેક્ષા રાખવામાં આવી રહી છે.

મહિલા ક્રિકેટનો પણ હાલ પૂરતો સમાવેશ 

મહિલા ક્રિકેટ (ટી20 ફોર્મેટ) પહેલીવાર આ રમતોનો ભાગ બની છે. ભારતના કેટલાક ખેલાડીઓ બર્મિંગહામ પહોંચી ચૂક્યા છે, જ્યારે કેટલાક વૈશ્વિક ટુર્નામેન્ટમાં ભાગ લીધા બાદ સીધા જ ત્યાં પહોંચી જશે. બાકીના ખેલાડીઓ નવી દિલ્હીથી રવાના થશે. કોમનવેલ્થ ગેમ્સ વિલેજ 23 જુલાઈએ સત્તાવાર રીતે ટુકડી માટે ખુલશે. ભારતીય ટુકડી પાંચ અલગ અલગ જગ્યાએ હશે.