જૂનાગઢના માણાવદરમાં ભાજપ પ્રદેશ પ્રમુખ સી.આર.પાટીલની અધ્યક્ષતામાં કાર્યક્રમનું આયોજન કરવામાં આવ્યું છે. આ કાર્યક્રમ શરૂ થયા પહેલાં વિવાદ થયો હતો. કાર્યક્રમની આમંત્રણ પત્રિકામાં કડવા પાટીદારના હોદ્દેદારોના નામની બાદબાકી થતાં વિવાદ થયો હતો જેને લઇને હવે આમંત્રણ પત્રિકા ફરી છપાવાઈ છે. જેમાં માણાવદર શહેર ભાજપ પ્રમુખ જીતુભાઇ પનારા અને તાલુકા ભાજપ પ્રમુખ ગોવિંદભાઇ સવસાણીનું નામ લખવામાં આવ્યું છે.
જુની પત્રિકાને લઇને શું હતો વિવાદ
માણાવદરમાં આયોજિત કાર્યક્રમ પહેલા એક ઓડિયો ક્લિપ વાયરલ થઇ હતી. જેમાં સાંસદના PA અને માણાવદર નગર પાલિકાના પૂર્વ પ્રમુખ દિનેશ કાલરીયા વચ્ચેની વાતચીતની ક્લિપ વાયરલ થઇ હતી જેમાં કાર્યક્રમની આમંત્રણ પત્રિકામાં ભાજપના કડવા પાટીદાર આગેવાનોના નામ ન હોવા બાબતે નારાજગી જોવા મળી હતી. માણાવદર શહેર ભાજપ પ્રમુખ કે નગરપાલિકા પ્રમુખ કોઇનું પણ નામ પત્રિકામાં હતું નહીં જેથી તેઓમાં ભારે રોષ અને નારાજગીની લાગણી જોવા મળી હતી.આ ઓડિયો ક્લિપ વાયરલ થતા આજે નવી આમંત્રણ પત્રિકા છાપવામાં આવી છે.
માણાવદરમાં 7 જુલાઇએ કાર્યક્રમનું આયોજન
માણાવદરના પાનેરા શિક્ષણ સંકુલમાં ગુરુવારે પ્રદેશ ભાજપ પ્રમુખની હાજરીમાં વિવિધ કાર્યક્રમનું આયોજન કરાયું છે. જેમાં સાત જુલાઇના રોજ જે.એમ. પાનેરા શૈક્ષણિક સંકુલમાં બપોરે 3.30 કલાકે ભૂતપૂર્વ વિદ્યાર્થીઓનું સન્માન કરવાનું આયોજન કરવામાં આવ્યું છે. આ સમારંભના અધ્યક્ષ તરીકે સી.આર. પાટીલ પ્રદેશ અધ્યક્ષ, ભારતીય જનતા પાર્ટી ગુજરાત પ્રદેશ તથા ઉદ્દઘાટક તરીકે પ.પૂ. મહંતશ્રી મુક્તાનંદ બાપુ, પ્રમુખ અખિલ ભારતીય સાધુ સમાજ તથા અન્ય અનેક મહાનુભાવો હાજરી આપશે.