પબ્લિક પ્રોવિડન્ટ ફંડ (PPF) જોખમ વગર સૌથી વધુ ફિક્સ્ડ વ્યાજ આપતો રોકાણનો વિકલ્પ છે. લાંબા ગાળે ગેરન્ટીડ રિટર્ન જોઇતુ હોય તે લોકો PPFમાં રૂપિયા રોકે છે. અહી મળતુ વ્યાજ દર 3 મહિને સરકાર ફિક્સ કરે છે.
હાલમાં PPFનો વ્યાજ દર 8% છે. જોકે PPFની મર્યાદા એ છે કે વ્યકિત વર્ષમાં વધુમાં વધુ 1.5 લાખ રૂપિયા જ ઇન્વેસ્ટ કરી શકે છે. પરંતુ જો તમે 1.5 લાખ કરતા વધારે રકમ રોકવા માંગો છો તો બીજા વિકલ્પ ઉપલબ્ધ છે. જાણો PPF ઉપરાંત રોકાણના એવા ઑપ્શન જેમાં ફિક્સ્ડ રિટર્ન મળે છે.
પોસ્ટ ઑફિસ ટાઇમ ડિપોઝિટ:
એક વાર તમારી PPF લિમિટ પૂરી થઈ જાય પછી તમે પોસ્ટ ઑફિસ ટાઇમ ડિપોઝિટનો વિકલ્પ પસંદ કરી શકો છો. અહીં તમને 7.8 % રિટર્ન મળશે. આ ડિપોઝિટ 1 વર્ષ, 2 વર્ષ, 3 વર્ષ અને 5 વર્ષના ગાળા માટે હોય છે. અહીં રોકાણ કરવા માટે કલમ 80C અંતર્ગત ટેક્સમાં પણ બાદબાકી મળશે. PPFની જેમ આ સ્કીમ માટે પણ આખા વર્ષ માટે ભારત સરકાર દ્વારા વ્યાદ દર ફિક્સ કરવામાં આવે છે. સ્કીમ પર 3 મહિને વ્યાજ ગણાય છે પરંતુ તે વર્ષના અંતે જ મળે છે. આ ડિપોઝિટ માટે જે વ્યાજ મળે તેના પર ટેક્સ ભરવો પડે છે.
બેંક ફિકસ્ડ ડિપોઝિટ:
બેંક FD ભારતીયોનું સૌથી લોકપ્રિય રોકાણનું માધ્યમ છે. મોટાભાગની કોમર્શિયલ બેંક અને નાની ફાયનાન્સ બેંક ફિક્સ્ડ ડિપોઝિટ ઑફર કરે છે. આ ડિપોઝિટ પર વ્યાજ, તેના સમય મુજબ અલગ-અલગ હોય છે. અત્યારે PSU અને ખાનગી બેંક દ્વારા ઑફર કરતા વ્યાજ દર 6-8.25 % વચ્ચે હોય છે. 5 વર્ષ કે વધુ સમય માટે અપાતા FD પર 80C અંતર્ગત છૂટ મળે છે. પરંતુ FD પર મળતા વ્યાજ પર ટેક્સ લાગે છે.
નેશનલ સેવિંગ્સ સર્ટિફિકેટ:
નેશનલ સેવિંગ્સ સર્ટિફિકેટમાં પણ ટેક્સ બચાવવા માટે એક પૉપ્યુલર વિકલ્પ છે જેને પોસ્ટ ઑફિસથી ખરીદી શકાય છે. NSCની મેચ્યોરિટી અવધિ 5 વર્ષની હોય છે અને અત્યારે તેના પર 8 % વ્યાજ મળે છે. આ વ્યાજ મેચ્યોરિટી વખતે ચૂકવવામાં આવે છે. NSCમાં તમને ઓછામાં ઓછું 100 રૂપિયાથી ઇન્વેસ્ટ કરી શકો છો. વધુમાં વધુ ઇન્વેસ્ટમેન્ટની કોઇ મર્યાદા નથી. ડિપોઝિટ પર મળતુ વ્યાજ ટેક્સેબલ છે.
સુકન્યા સમુદ્ઘિ યોજના:
નાની યોજનામાં સૌથી વધુ વ્યાજ સુકન્યા યોજનામાં ઑફર થાય છે. અત્યારે આ સ્કીમમાં ડિપોઝિટ પર વર્ષે 8.5 % વ્યાજ મળે છે. આ સ્કીમ બધા માટે નથી. 10 વર્ષથી નાની વયની છોકરીના માતા-પિતા જ પોતાની બાળકીના નામે આ એકાઉન્ટ ખોલાવી શકો છો. આ એકાઉન્ટ સ્કીમમાં એકાઉન્ટ ખોલવાની તારીખથી બાળકી 21 વર્ષની થાય ત્યારે મેચ્યોર થાય છે. વધુમાં વધુ બે દીકરીઓના નામ સુધી સુકન્યા સમૃદ્ધિ એકાઉન્ટ ખોલી શકાય છે.
આ એકાઉન્ટમાં વધુમાં વધુ વર્ષે 1.5 લાખ રૂપિયા અને ઓછામાં ઓછા 1000 રૂપિયા ડિપોઝિટ કરી શકાય છે. ડિપોઝિટ રકમ 80Cમાંથી બાદ મળે છે. બાળકી 18 વર્ષની થાય ત્યારે 50 % સુધી બેલેન્સ પાછુ ખેંચી શકો છો.