સર્ચ ઓપરેશન / ડ્રગ્સ કેસમાં રાજકોટ સુધી તાર, ગોંડલ હાઈવે નજીક ફાર્મા કંપનીને મારી દેવાયું સીલઃ સૂત્ર

• વડોદરા ડ્રગ્સકાંડ મામલે રાજકોટ સુધી તપાસ
• ATSએ રાજકોટની ફાર્મા કંપનીમાં હાથધરી તપાસ
• રાજકોટ જિલ્લાના હડમતાળામાં તપાસનો ધમધમાટ

રાજ્યમાં પોલીસ અને સુરક્ષા એજન્સીના સતર્કતાના દાવા વચ્ચે પણ તાજેતરમાં વડોદરામાં 225 કિલો MD ડ્રગ્સ ઝડપાતા પોલીસ પણ ચોંકી ગઇ હતી. ત્યારબાદ આ મામલે પોલીસ એલર્ટ મોડમાં આવી ગઇ છે અને આ ડ્રગ્સકાંડને લઈને એક એક કડીઑ જોડી પોલીસ તાપસમાં ઉતરી છે. જેના ભાગરૂપે રાજ્યભરમાં ATSની ટીમો દ્વારા સર્ચ ઑપરેશન હાથ ધરવામાં આવી રહ્યું છે. ATSની ટીમો દ્વારા મોરબી, વડોદરા, ભરૂચ અને સુરત બાદ હવે રાજકોટમાં તપાસ હાથ ધરી છે.

રાજકોટ જિલ્લાના હડમતાળામાં તપાસનો ધમધમાટ
સૂત્રો દ્વારા મળતી માહિતી મુજબ વડોદરા ડ્રગ્સકાંડ મામલે ATSએ રાજકોટની ફાર્મા કંપનીમાં તપાસ આદરી છે. ડ્રગ્સનું રો-મટિરિયલ રાજકોટથી વડોદરા પહોંચ્યું હોવાની આશંકા સેવાઇ રહી છે, જેના લીધે જિલ્લાના હડમતાળા ખાતે  ATS સર્ચ ઓપરેશન કરી રહ્યું છે. 18 તારીખે ATSની સૂચના બાદ રાજકોટ પોલીસે કાર્યવાહી કરી છે. મહત્વનું છે કે ATSની સૂચનાથી કંપનીને 18 તારીખે સિલ કરાઈ હતી, કંપનીના સંચાલકોના નિવેદનો પણ નોંધવામાં આવ્યા હતા.

થોડા દિવસ અગાઉ ATSએ ડ્રગ્સ અંગે એક ગોડાઉનમાં દરોડા પાડ્યા 
મહત્વનું છે કે થોડા દિવસ અગાઉ ATSએ ડ્રગ્સ અંગે એક ગોડાઉનમાં દરોડા પાડ્યા હતા. જેમાં નેક્ટર કેમના માલિકોએ જ આ ગોડાઉન ભાડે રાખ્યું હોવાની માહિતી સામે આવી હતી. નેક્ટર કેમ કેમિકલ કંપનીના આરોપીને સાથે રાખી ATS દ્વારા તપાસની કાર્યવાહી હાથ ધરાઇ. પ્લોટ નંબર 13 એક નંબરના ભવાની એન્ટરપ્રાઇઝ નામના ગોડાઉનમાંથી ATSને ડ્રગ્સનું શંકાસ્પદ રો-મટિરિયલ હાથ લાગ્યું હતું. ત્યારબાદ ગોડાઉનમાંથી ઝડપાયેલા રો-મટિરિયલનું સેમ્પલ પણ તપાસ અર્થે મોકલવામાં આવ્યું છે. જોકે આ મામલે ગોડાઉનમાંથી એક આરોપીની ધરપકડ પણ કરવામાં આવી હતી. મહત્વનું છે કે, છેલ્લા પાંચ વર્ષથી આ ગોડાઉન ભાડે રાખવામાં આવ્યું હતું.
  
 

વડોદરા ફેક્ટરીમાંથી ઝડપાયું હતું 1125 કરોડની કિમતનું ડ્રગ્સ
ઉલ્લેખનીય છે કે, વડોદરાના સાવલી તાલુકાના મોક્સી ગામમાં આવેલી નેક્ટર કેમ નામની કેમિકલ ફેક્ટરીની આડમાં ચાલતી ડ્રગ્સની ફેક્ટરી પર ગુજરાત ATSએ રેડ પાડી હતી. આ રેડમાં રૂ. 1125 કરોડની કિંમતનું 225 કિલો MD ડ્રગ્સ ઝડપી પાડ્યું હતું. ગુજરાત ATS એ  બે દિવસ સુધી ઓપરેશન ચલાવી બે મુખ્ય આરોપીઓની હાલ ધરપકડ કરી છે.આ આરોપીઓએ  સપ્ટેમ્બર મહિનાના 2021ના વર્ષથી અત્યાર સુધીમાં 240 કિલો એમ.ડી ડ્રગઝ બનવાયુ છે. જેમાંથી ગુજરાત એટીએસે 2 આરોપીઓ પાસેથી 225 કિલો ગ્રામ.એમ.ડી ડ્રગઝ જેની અંદાજે કિંમત 1125 કરોડ રૂપિયાનું જપ્ત કર્યું હતું.