વડોદરા / સેક્સ રેકેટમાં પકડાયેલી બાંગ્લાદેશી યુવતીની સુરક્ષા એજન્સીઓ દ્વારા પૂછપરછ

વડોદરાના કારેલીબાગના સેક્સ રેકેટમાં પકડાયેલી બાંગ્લાદેશી યુવતીની દેશની જુદી જુદી સુરક્ષા એજન્સીના અધિકારીઓ દ્વારા આજે લાંબી પૂછપરછ કરવામાં આવી હતી. મકરપુરા એસટી ડેપો પર ભૂલી પડેલી બાંગ્લાદેશી યુવતી સોનિયાની ભાષા કોઇ સમજી શકતું નહીં હોઇ અભયમ્ ટીમની મદદ લેવાઇ હતી અને તેમણે બંગાળી વ્યકિતની મદદ લઇ પૂછપરછ કરતાં કારેલીબાગના એમઆઇજી ફ્લેટમાં ચાલતું સેક્સ રેકટ બહાર આવ્યું હતું.

ઉપરોક્ત બનાવ બાદ કારેલીબાગ પોલીસના પીઆઇ આર. એ. જાડેજાએ એમઆઇજી ફ્લેટમાં છાપો માર્યો હતો અને સમગ્ર પ્રકરણમાં પોલીસે છ યુવતીઓને છોડાવી સુનીતા નામની યુવતીની ધરપકડ કરી હતી. જ્યારે સાત દલાલની ધરપકડ કરવામાં આવી છે.

બાંગ્લાદેશી ઘૂસણખોર યુવતી પકડાતાં દેશની જુદી જુદી સુરક્ષા એજન્સીઓને જાણ કરાઇ હતી અને તે પૈકીની સેન્ટ્રલ આઇબી તેમજ આર્મી ઇન્ટેલિજન્સના અધિકારીઓએ આજે દુભાષિયાની મદદ લઇ સોનિયાની લાંબી પૂછપરછ કરી  બાંગ્લાદેશ સુધી ફેલાયેલા સેક્સ રેકેટને લગતી મહત્ત્વની માહિતી એકત્રિત  કરી હતી.