ડિજિટલ / 2023 સુધીમાં દેશમાં સ્માર્ટફોન રાખનારા લોકો થશે ડબલ, ઇન્ટરનેટ યુઝર્સમાં ચીન બાદ બીજા નંબરે

શું છે રિપોર્ટમા દાવો?
ઔદ્યોગિક વિકાસની સાથે-સાથે ભારત ટેક્નોલોજી તરફ પણ ખુબ આગળ વધી રહ્યું છે. એટલે આજે સ્માર્ટફોન અને ઈન્ટરનેટ વાપરનારાઓની સંખ્યામાં પણ ધરખમ વધારો થયો છે. એટલું જ નહીં પરંતુ ઈન્ટરનેટ ડેટા સતત સસ્તો થવાના કારણે વર્ષ 2023 સુધીમાં ઈન્ટરનેટનો વપરાશકર્તાઓની સંખ્યામાં અંદાજીત 40 ટકા જેટલો વધારો થશે. તો બીજી તરફ સ્માર્ટફોન રાખનારા લોકોની સંખ્યામાં પણ બે ગણો વધારો થશે. તેવો મૈકિન્સેના એક રિપોર્ટમાં દાવો કરવામાં આવ્યો છે.
 

ચીન બાદ બીજા નંબરે આવે છે ભારત
મહત્વનું છે કે, વર્ષ 2013થી અત્યાર સુધીમાં ઈન્ટરનેટ ડેટાના ભાવમાં 95 ટકા જેટલો ઘટાડો થઈ ચૂક્યો છે. રિપોર્ટમાં એવું પણ કહેવામાં આવ્યું છે કે, મુખ્ય ડિજિટલ ક્ષેત્ર 2025 સુધીમાં બે ગણુ વધીને 355થી 435 અરબ ડોલરનું બની જશે. મૈકિન્સે ગ્લોબલ ઈન્સ્ટિટ્યૂટના રિપોર્ટ ડિજિટલ ઈન્ડિયા-ટેક્નૉલોજી ટુ ટ્રાંસફૉર્મ એ કનેક્શન નેશનમાં કહ્યું છે કે, ભારત ડિજિટલ ગ્રાહકો માટે સૌથી વધુ ઝડપથી વિકસતા બજારોમાંનુ એક છે. દેશમાં 2018 સુધીમાં ઈન્ટરનેટ વપરાશકર્તા 56 કરોડ હતા. જે ચીન પછી બીજા નંબરે આવે છે.
 

બીજી તરફ ઈન્ટરનેટના વપરાશ અંગે જો વાત કરવામાં આવે તો દર મહિને ભારતમાં ડેટા યૂઝર્સ સરેસાશ 8.30 GB ડેટા વાપરે છે. તેની તુલનાએ ચીનમાં એક યૂઝર્સ 5.50 GB અને દક્ષિણ કોરિયામાં 8.5 GB જેટલો ડેટા વાપરે છે. એટલે કે, અન્ય દેશની તુલનામાં ભારતમાં ઈન્ટરનેટનો સૌથી વધુ વપરાશ થાય છે. ભારત અન્ય દેશોની તુલનામાં ડિજિટલ થઈ રહ્યું છે. ત્યારે જોવું રહ્યું કે, 2023 સુધીમાં ડિજિટલ દુનિયામાં ભારત કેટલી પ્રગતિ કરે છે.