સ્વિટ્ઝર્લેન્ડના લુસાનેમાં ઓલિમ્પિક અને પેરાલિમ્પિક ગેમ્સના નવા હેડક્વાર્ટરને ખુલ્લું મૂકવામાં આવ્યું છે. આ હેડક્વાર્ટરને નેધરલેન્ડ્સની એક કંપનીએ તૈયાર કર્યું છે, જેને જૂની બિલ્ડિંગના સ્થાને જ બનાવવામાં આવ્યું છે. સ્વિસ આર્કિટેક્ટ ઇટેન બ્રેશબુલના જણાવ્યા અનુસાર આ દુનિયાની સૌથી સારી ઈકો ફ્રેન્ડલી ઇમારતોમાંની એક છે. ૧૪.૫ કરોડ ડોલર (લગભગ ૧૦૦૦ કરોડ રૂપિયા)માં બનેલી આ ઇમારતને IOCના ૫૦૦ કર્મચારીઓ માટે તૈયાર કરવામાં આવી છે.
જિનિવાઃ સ્વિટ્ઝર્લેન્ડના લુસાનેમાં ઓલિમ્પિક અને પેરાલિમ્પિક ગેમ્સના નવા હેડક્વાર્ટરને ખુલ્લું મૂકવામાં આવ્યું છે. આ હેડક્વાર્ટરને નેધરલેન્ડ્સની એક કંપનીએ તૈયાર કર્યું છે, જેને જૂની બિલ્ડિંગના સ્થાને જ બનાવવામાં આવ્યું છે. સ્વિસ આર્કિટેક્ટ ઇટેન બ્રેશબુલના જણાવ્યા અનુસાર આ દુનિયાની સૌથી સારી ઈકો ફ્રેન્ડલી ઇમારતોમાંની એક છે. ઇટેનના દાવાને એ વાત પરથી સમજી શકાય છે કે નવા હેડક્વાર્ટરમાં જૂના બિલ્ડિંગનું લગભગ ૯૫ ટકા મટીરિયલને રિસાઇકલ કરવામાં આવ્યું છે.
૧૪.૫ કરોડ ડોલર (લગભગ ૧૦૦૦ કરોડ રૂપિયા)માં બનેલી આ ઇમારતને IOCના ૫૦૦ કર્મચારીઓ માટે તૈયાર કરવામાં આવી છે. આ ઇમારતમાં ઊર્જા જરૂરિયાતો પૂરી કરવા માટે અક્ષય સ્રોતનો ઉપયોગ કરવામાં આવ્યો છે. બિલ્ડિંગની આખી છત પર સોલાર પેનલ્સ લગાવવામાં આવી છે, જે સૌર ઊર્જા દ્વારા લગભગ ૬૦ ઘરને પૂરી પાડી શકાય તેટલી વીજળી પેદા કરશે અને બિલ્ડિંગને રોશન રાખશે.
હેડક્વાર્ટર બિલ્ડિંગમાં પાણી બચાવવા માટે પણ શાનદાર વ્યવસ્થા કરવામાં આવી છે. જળ સંરક્ષણને ધ્યાનમાં રાખીને બિલ્ડિંગમાં જ વરસાદના પાણીને એકઠું કરવાની વ્યવસ્થા કરાઈ છે. આ પાણીનો સિંચાઈ અને ટોઇલેટ માટે ઉપયોગ કરાશે. ઇમારતની ડિઝાઇન પણ આગળની તરફ ઝૂકેલી બનાવવામાં આવી છે. કન્સ્ટ્રક્શન કંપનીના સ્થાપક કિમ નિલ્સનના જણાવ્યા અનુસાર, ''ઇમારતને કર્મચારીઓને અનુકૂળ બનાવવા માટે ઘણી રોશનીની જરૂર પડશે, પરંતુ વધારે પ્રકાશની નહીં.
આથી જ આ ઇમારતનો આગળનો હિસ્સો ઝુકાવવામાં આવ્યો છે, જેથી આકાશમાંથી સૂર્યનાં સીધાં કિરણો કાચની અંદર પહોંચીને ગરમી પેદા ના કરે.'' બિલ્ડિંગનું નિર્માણકાર્ય ૨૦૧૬માં શરૂ કરવામાં આવ્યું હતું. લગભગ બે વર્ષના સમયગાળામાં જ તેને તૈયાર કરી દેવામાં આવ્યું. ૨૦૧૮માં એમ્સ્ટડર્મમાં યોજાયેલા આર્કિટેક્ચર ફેસ્ટિવલમાં આ ઇમારતને 'ઓફિસ- ફ્યૂચર પ્રોજેક્ટ'ના એવોર્ડથી નવાજવામાં આવી ચૂકી છે.