સાત વર્ષ બાદ વડોદરાને મળી ઇન્ટરનેશનલ મેચ ભારત-ઓસ્ટ્રેલિયાનો થશે મુકાબલો

વડોદરાઃ સાત વર્ષ પછી વડોદરાને ઇન્ટરનેશનલ મેચ મળી છે. વડોદરાના રિલાયન્સ મેદાન પર આગામી 12 15 અને 18 તારીખે ભારત અને ઓસ્ટ્રેલિયાની મહિલા ટીમનો મુકાબલો થશે. બીસીસીઆઈ દ્વારા આ મેચો વડોદરા બીસીએને આપવામાં આવી છે.

વડોદરા બીસીએએ તેના માટેની તમામ તૈયારીઓ કરી લીધી છે. ત્રણ ઓડીઆઈ મેચો વડોદરાના રિલાયન્સ ગ્રાઉન્ડ પર રમાશે. આંતરરાષ્ટ્રીય મહિલા ક્રિકેટ મેચ વડોદરામાં રમાતી હોય તો વડોદરા તેની ઉજવણીમાં કેમ પાછું રહે?

બીસીએ દ્વારા વડોદરાની તમામ શાળાઓની દીકરીઓને ક્રિકેટ જોવા માટે આમંત્રણ આપ્યું છે. તેમની જમવાની વ્યવસ્થા પણ અહીં કરવામાં આવી છે. આ ઉપરાંત બીસીએએ કોઈપણ પ્રકારની ફી વગર લોકોને આ મેચ નિહાળવા દેવામાં આવશે તેવો પણ નિર્ણય કર્યો છે.

આ ઉપરાંત 12 તારીખે 12 કલાકે 5 હજાર મહિલાઓની માનવ સાંકળ રચીને મહિલા સશક્તિકરણના સ્લોગનો બોલવામાં આવશે અને એક અનોખો રેકોર્ડ સ્થાપવાનો પ્રયાસ કરવામાં આવશે. વધુમાં વધુ મહિલાઓ ક્રિકેટમાં આગળ આવે તે માટે પ્રયાસ કરવામાં આવશે.