કાર્યવાહી / ઇન્ટરનેશનલ કોલ સેન્ટર રેકેટ કરનારને સિંગાપોરની કોર્ટે ફટકારી આકરી સજા

અમેરિકાની એજન્સી હિતેશને શોધતી હતી ત્યારે તે સિંગાપોર નાસી ગયો હતો જ્યાં તેણે કોલ સેન્ટર શરૂ કર્યું હતું.  શહેરની અલગ અલગ જગ્યાએ સાત આઠ વર્ષ પહેલાં ઇન્ટરનેશનલ કોલ સેન્ટરનો પાયો બોપલમાં રહેતા હિતેશ હિગળાજિયાએ નાખ્યો હતો. હિતેશને ગુજરાતના ટોચના આઇપીએસ સાથે ધરોબો હોવાથી તેણે બેરોકટોક રીતે કોલ સેન્ટરો શરૂ કર્યાં હતાં.

હિતેશની ધીકતી કમાણી જોઇને સાગર ઠાકર ઉર્ફે સેગી, નીરવ રાયચૂરા, વિકી જ્યસ્વાલ, રાહુલ ડોગરાએ પણ હિતેશ સાથે મુલાકાત કરી હતી અને તેમણે પણ કોલ સેન્ટર શરૂ કરી દીધાં હતાં.  શહેરમાં કોલ સેન્ટરનું બીજ રોપનાર હિતેશને સીધા અધિકારીઓ સાથે સંબંધ હોવાથી તેનો વાળ પણ વાંકો કરવાની હિંમત લોકલ પોલીસની હતી નહીં.

બે વર્ષ પહેલાં થાણે ક્રાઇમ બ્રાન્ચે અમદાવાદના સેગી ઉર્ફે સાગર ઠાકરના કોલ સેન્ટર પર દરોડા પાડ્યા હતા ત્યારબાદ તપાસનો રેલો અમદાવાદ સુધી પહોંચ્યો હતો. અમદાવાદના પ્રહ્લાદનગર ખાતે પણ થાણે ક્રાઇમ બ્રાન્ચે દરોડા પાડ્યા હતા. થાણે ક્રાઇમ બ્રાન્ચની રેડ બાદ અમદાવાદ ક્રાઇમ બ્રાન્ચ અને લોકલ પોલીસે પણ વિવિધ જગ્યાઓ પર દરોડા પાડ્યા હતા. 

થાણે ક્રાઇમ બ્રાન્ચની તપાસમાં અલગ અલગ નામ સામે આવ્યાં હતાં જેમાં હિતેશ હિંગળાજિયાનું નામ પણ મોખરે હતું. હિતેશ હિંગળાજિયા યુએસના ડેટા  લાવીને ગુજરાત, પુણે અને મુંબઈના કોલ સેન્ટરોને પૂરા  પાડીને માતબર રકમ મેળવતો હતો. તાજેતરમાં સોલામાં કોલ સેન્ટર પર દરોડા પડ્યા હતા જેમાં હિતેશ ઠક્કર અને  મયૂર માંગરોળિયાની ધરપકડ બાદ જામીન પર છુટકારો થયો હતો. હિતેશની પત્ની સહિત ૨૨ આરોપીને પોલીસે ઝડપ્યા  હતા.

સોલા પોલીસની તપાસમાં હિતેશ હિંગળાજિયાની સામે  એફબીઆઈ દ્વારા કરવામાં આવેલ કેસની ફાઈલ મળી આવી હતી. આરોપી હિતેશ હિંગળાજિયા ગુજરાત અને પુણેના ઉચ્ચ  પોલીસ અધિકારીઓ સાથે સંપર્ક ધરાવતો હોવાથી  કોલ સેન્ટરોમાં અમેરિકન નાગરિકોના ડેટા પૂરા પાડતો હતો. હિતેશ વિરુદ્ધમાં એફબીઆઇએ રેડ કોર્નર નોટિસ ઇશ્યૂ્ કરતાં તે સિંગાપોર નાસી છુટ્યો હતો.

સિંગાપોરમાં તેણે ફરીથી કોલ સેન્ટર શરૂ કર્યું હતું. સિંગાપોર પોલીસને હિતેશના ઇરાદાઓની જાણ થતા તેની ધરપકડ કરી લીધી હતી. આ વાતની જાણ  એફબીઆઈને થતાં તેણે હિતેશ હિંગળાજિયાનો કબજો માટે  સિંગાપોરની કોર્ટમાં કાર્યવાહી કરીને મેળવ્યો હતો.  બાદમાં હિતેશને એફબીઆઈ યુએસ લઈ ગઈ હતી. સૂત્રોનાં જણાવ્યા અનુસાર હિતેશ વિરુદ્ધમાં સિંગાપોરની કોર્ટમાં કેસ ચાલતા તેને ૪૫ વર્ષની સજા ફટકારવાનો આદેશ કર્યો છે