જાણીતી ભારતીય પહેલવાન બબિતા ફોગાટ રવિવારે સાંજે ભારતના પહેલવાન વિવેક સુહાગ સાથે લગ્ન ગ્રંથીથી જોડાયા છે. રસપ્રદ વાત એ છે કે બંનેએ લગ્નના 7 ફેરા ફરવાની બદલે વધુ એક ફેરો લઇને કુલ 8 ફેરા લીધા હતા. આ ફેરા વડે તેમણે 'બેટી બચાવો બેટી પઢાવો' સંદેશ પાઠવ્યો હતો. આ ઉપરાંત નવદંપતિએ એક એક છોડ વાવીને પર્યાવરણને બચાવવાની પ્રતિજ્ઞા લીધી હતી.
ન્યુઝ એજન્સી PTIના અહેવાલ પ્રમાણે બલાલી ગામમાં થયેલા આ લગ્ન કોઈ જ પ્રકારના દાન દહેજ પ્રથા વગર અને હિન્દૂ પ્રણાલીથી થયા હતા. મળેલી જાણકારી મુજબ આ પ્રસંગમાં પરિવારજનો ઉપરાંત અનેક વિદેશથી પહેલવાનો મહેમાન સ્વરૂપે આવ્યા હતા. આ પ્રસંગે બબિતાના મોટા બહેન ગીતા ફોગાટે તેમના ટ્વીટર એકાઉન્ટ ઉપર લગ્નનો ફોટો શેર કર્યો હતો.
આ પહેલા રેસલર બબિતાએ પોતાના ટ્વીટર એકાઉન્ટ ઉપર પોતાના લગ્નની પ્રથમ વિધિ 'બાન'ના ફોટોઝ શેર કર્યા હતા. આ વિધિમાં બબિતા લાલ અને ભૂરા રંગના સૂટમાં દેખાતી હતી. આ ઉપરાંત લગ્નની અન્ય વિધિઓના ફોટોઝ પણ શેર કર્યા હતા.
મહિલા પહેલવાન બબિતા ફોગાટ 2014 અને 2018 કોમનવેલ્થ ગેમ્સમાં કુશ્તીમાં ગોલ્ડ મેડલ જીતી ચુકી છે. આ ઉપરાંત 2013માં બબિતાની ઉપલબ્ધીઓના પગલે હરિયાણા પોલીસે તેમને પોલીસ સબ ઇન્સ્પેકટર બનાવ્યા હતા. આ ઉપરાંત તેઓ ભાજપ સાથે જોડાયેલા છે. બબિતાના મોટા બહેન ગીતા ફોગાટ કોમનવેલ્થમાં ભારતને ગોલ્ડ અપાવનાર પ્રથમ મહિલા પહેલવાન છે.