સાઉથ આફ્રિકા સામે ગઈ કાલે ટીમ ઇન્ડિયાની જાહેરાત થવાની હતી તેની પહેલાં એ તો નક્કી જ હતું કે. એલ. રાહુલના સ્થાને કોઈ યુવા ખેલાડીને તક મળશે અને બન્યું પણ એવું જ. છેલ્લા ઘણા સમયથી ઠીક-ઠાક ફોર્મમાં રમતા રાહુલની ટેસ્ટ ટીમમાંથી હકાલપટ્ટી થઈ અને તેના સ્થાને પંજાબના યુવા બેટ્સમેન શુભમન ગિલને પહેલી વાર ટેસ્ટ ટીમમાં પસંદ કરવામાં આવ્યો છે.
2018 માં રમાયેલી અંડર 19 વર્લ્ડકપથી સતત ચર્ચામાં શુભમન ગિલ
ભારતે જીત્યો હતો U 19 વર્લ્ડકપ, મેન ઑફ ધ સીરિઝ રહ્યો હતો ગિલ
IPL માં પણ KKR ની તરપથી આ ખેલાડીએ શાનદાર ફોર્મ કર્યુ હતુ.
ફક્ત ચાર દિવસ પહેલાં જ 20 વર્ષનો થયેલો શુભમન માત્ર એક સિઝન ફર્સ્ટ ક્લાસ ક્રિકેટ રમ્યો અને તેને ટેસ્ટ ટીમમાં સ્થાન મળી ગયું, જ્યારે ઘરેલુ ક્રિકેટમાં છેલ્લા ઘણા સમયથી શાનદાર પ્રદર્શન કરી રહેલા પ્રિયાંક પંચાલ અને અભિમન્યુ ઈશ્વરનને તક મળી નહીં. શુભમન ગિલને જે કારણ પર તક મળી છે તેના પર એક નજર કરીએઃ
શાનદાર રેકોર્ડઃ
શુભમન ગિલ અંડર-19 વર્લ્ડકપથી જ ઝળકી ઊઠ્યો હતો અને ત્યારથી સતત તેનું બેટ રનનો વરસાદ કરી રહ્યું છે. ભારતને અંડર-19 વર્લ્ડકપ જિતાડ્યા બાદ ગિલને પંજાબે ફર્સ્ટ ક્લાસ મેચોમાં તક આપી અને તેણે આ ફોર્મેટમાં પણ કોઈને નિરાશ કર્યા નહીં. ગિલે 14 ફર્સ્ટ ક્લાસ મેચમાં 72.15ની સરેરાશથી 1443 રન ફટકાર્યા. તેણે ચાર મેચમાં સેન્ચુરી અને આઠ હાફ સેન્ચુરી પણ ફટકારી. આ દરમિયાન શુભમને 268 રનની મોટી ઇનિંગ્સ પણ રમી હતી.
મોટી ઇનિંગ્સ રમવાનો દમઃ ગિલની ઉંમર હજુ ઘણી નાની છે, પરંતુ તે મોટી ઇનિંગ્સ રમવાનો દમ રાખે છે. શુભમને માત્ર 14 વર્ષની ઉંમરે પંજાબ ઇન્ટર ડિસ્ટ્રિક્ટ અંડર-16 ટૂર્નામેન્ટમાં 351 રનની ઇનિંગ્સ રમી હતી. એ ઉપરાંત તેણે રણજી ટ્રોફીમાં તામિલનાડુ સામે 268 રનની ઇનિંગ્સ રમી. તાજેતરમાં ગિલે વિન્ડીઝ-એના સામે 204 રન બનાવ્યા. આ સાથે તે ફર્સ્ટ ક્લાસ ક્રિકેટમાં સૌથી નાની ઉમરમાં ડબલ સેન્ચુરી ફટકારનારો ભારતીય પણ બન્યો.
ઓપનિંગ અને મિડલ ઓર્ડરમાં પણ ફિટઃ ગિલની સૌથી મોટી ખાસિયત એ છેકે તે ઓપનિંગ અને મિડલ ઓર્ડર- એમ બંને સ્થાને બેટિંગ કરી શકે છે. ઓપનર તરીકે ગિલે ફર્સ્ટ ક્લાસ ક્રિકેટમાં 16 મેચમાં 76ની સરેરાશથી 1072 રન બનાવ્યા છે, જ્યારે મિડલ ઓર્ડરમાં તેણે ૫૩ની સરેરાશથી 371 રન બનાવ્યા છે. બેટિંગ ઉપરાંત ગિલ એક શાનદાર ફિલ્ડર પણ છે. કદાચ આ જ કારણોસર પસંદગીકારોએ શુભમન ગિલને ટીમ ઇન્ડિયામાં સામેલ કર્યો છે.