નવી કાર લેવી હોય તો વ્યાજના દરમાં કરવામાં આવ્યો છે ઘટાડો, બેંક દ્વારા ગ્રાહકો પોતાની પસંદગીની કાર ખરીદી શકે તે માટે લેવાયો આ નિર્ણય
જો તમે પણ કાર ખરીદવાનું વિચારી રહ્યા છો તો આ સમાચાર તમારા માટે છે. કાર કંપનીઓ દ્વારા કારની વધતી કિંમતો વચ્ચે બેંક ઓફ બરોડા (BoB) એ કાર લોન પરના વ્યાજ દરમાં ઘટાડો કર્યો છે. આનો સીધો ફાયદો તમને થશે. બેંક ઓફ બરોડા દ્વારા કાર લોન પરના વ્યાજ દરમાં 0.25 ટકાનો ઘટાડો કરવામાં આવ્યો છે.
વ્યાજ દર ઘટાડીને 7 ટકા કર્યો
બેંક દ્વારા વ્યાજ દર ઘટાડીને 7 ટકા કરવામાં આવ્યો છે. એક તરફ વિવિધ બેંકો લોન પર વ્યાજ વધારી રહી છે તો બીજી તરફ બેંક ઓફ બરોડાએ વ્યાજમાં ઘટાડો કરીને મોટી રાહત આપી છે. હાલમાં, બેંક કાર લોન પર 7.25 ટકા વાર્ષિક વ્યાજ વસૂલતી હતી. બેંક તરફથી કહેવામાં આવ્યું છે કે વ્યાજ દરમાં ઘટાડા સાથે લોનની પ્રોસેસિંગ ફીમાં પણ ઘટાડો કરવામાં આવ્યો છે.
પ્રોસેસિંગ ફી પર ભારે ડિસ્કાઉન્ટ
આ ઑફર હેઠળ, બેંક પ્રોસેસિંગ ફી તરીકે ગ્રાહકો પાસેથી રૂ. 1,500 + GST વસૂલશે. આ ઑફર 30 જૂન, 2022 સુધી માન્ય રહેશે. આ લાભ નવી કાર ખરીદવા પર જ મળશે. વ્યાજ દર ગ્રાહકની 'ક્રેડિટ પ્રોફાઇલ' સાથે લિંક કરવામાં આવશે.
ગ્રાહકો પસંદગીનું વાહન ખરીદી શકશે
બેંકના જનરલ મેનેજર એચટી સોલંકીએ જણાવ્યું હતું કે, "કાર લોન પરના વ્યાજ દર અને પ્રોસેસિંગ ફીમાં ઘટાડા સાથે હવે ગ્રાહકોને તેમની પસંદગીનું વાહન ખરીદવું વધુ સસ્તું થશે." જોકે, સેકન્ડ હેન્ડ કાર અને ટુ વ્હીલર માટે લોનના વ્યાજ દરમાં કોઈ ફેરફાર કરવામાં આવ્યો નથી. ગયા મહિને બેન્ક ઓફ બરોડાએ હોમ લોન પર વ્યાજ દર 6.75 થી ઘટાડીને 6.50 ટકા કર્યો હતો.
કેટલો ફાયદો થશે
જો તમે 7 વર્ષ માટે રૂ. 10 લાખની કાર લોન લેવાનું આયોજન કરો છો, તો તમારે 7.25 ટકાના દરે દર મહિને રૂ. 15,215ની EMI ચૂકવવી પડશે. હવે જો તમને એ જ લોન 7% વાર્ષિક દરે મળે છે, તો તમારે દર મહિને 15,093 રૂપિયાની EMI ચૂકવવી પડશે. એટલે કે દર મહિને તમારે 122 રૂપિયા ઓછા ચૂકવવા પડશે. જે એક વર્ષમાં 1464 રૂપિયા થાય.