ચોમાસું / ગુજરાતમાં આજથી ઘટી શકે છે મેઘરાજાનું જોર, જુઓ આજે રાજ્યના કયા-કયા જિલ્લાઓમાં વરસાદની આગાહી

• ગુજરાતમાં આજથી ઘટી શકે છે વરસાદનું જોર
• સૌરાષ્ટ્ર અને દ. ગુજરાતના કેટલાંક ભાગોમાં આજે પડી શકે છે વરસાદ
• ગુજરાતમાં સૌથી વધુ પાટણના શંખેશ્વરમાં 17 મી.મી. વરસાદ વરસ્યો

ગુજરાતમાં આજથી વરસાદનું જોર ઘટી શકે છે. રાજ્યમાં સૌરાષ્ટ્ર અને દક્ષિણ ગુજરાતના કેટલાંક ભાગોમાં આજે વરસાદ પડી શકે છે. કચ્છના પણ કેટલાંક વિસ્તારમાં આજે વરસાદ પડી શકે છે. આજે દીવ-દમણ, દાદરાનગર હવેલી, સૌરાષ્ટ્ર, કચ્છ, પોરબંદર, જૂનાગઢ, ગીર સોમનાથ, અમરેલી, ભાવનગર અને દ્વારકામાં વરસાદ વરસી શકે છે.

ગુજરાતમાં માત્ર એક દિવસમાં જ 140 તાલુકામાં વરસાદ

ગુજરાતમાં માત્ર એક દિવસમાં જ 140 તાલુકામાં વરસાદ વરસ્યો. જેમાં સૌથી વધુ પાટણના શંખેશ્વરમાં વરસાદ વરસ્યો. જ્યારે ઉત્તર ગુજરાતના વિવિધ વિસ્તારમાં ધીમી ધારે વરસાદ પડ્યો. તો મધ્ય ગુજરાતમાં પણ છૂટોછવાયો વરસાદ વરસ્યો.

ગુજરાતમાં સૌથી વધુ પાટણના શંખેશ્વરમાં 17 મી.મી. વરસાદ વરસ્યો

ગુજરાતમાં સૌથી વધુ પાટણના શંખેશ્વરમાં 17 મી.મી. વરસાદ વરસ્યો જ્યારે સમીમાં 15 મી.મી, સાણંદમાં 15 મી.મી. વરસાદ, અંજારમાં 14 મી.મી, ભાભરમાં 14 મી.મી. વરસાદ, રાધનપુરમાં 14 મી.મી, પેટલાદમાં 12 મી.મી. વરસાદ, વસોમાં 12 મી.મી, કલ્યાણપુરમાં 11 મી.મી. વરસાદ, દિયોદરમાં 11 મી.મી, હારીજમાં 11 મી.મી. વરસાદ, બેચરાજીમાં 11 મી.મી અને ખેરગામમાં 11 મી.મી. વરસાદ વરસ્યો.

સૌરાષ્ટ્ર અને દક્ષિણ ગુજરાતમાં એક બાજુ વરસાદ મન મૂકીને વરસ્યો

ઉલ્લેખનીય છે કે, સૌરાષ્ટ્ર અને દક્ષિણ ગુજરાતમાં અનરાધાર વરસાદ જ્યારે અમદાવાદ અને સુરેન્દ્રનગર પંથકમાં વરસાદ ખેંચાતા ખેડૂતો પરેશાનીમાં મુકાયા છે. ત્યારે સૌરાષ્ટ્ર અને દક્ષિણ ગુજરાતમાં એક બાજુ વરસાદ મન મૂકીને વરસ્યો છે. ગુજરાતમાં સારો વરસાદ પડતા સૌરાષ્ટ્ર અને દક્ષિણ ગુજરાતના નદી-નાળા છલકાતા ખેડૂતો ખુશી અનુભવી રહ્યા છે. તો બીજી તરફ અમદાવાદ અને સુરેન્દ્રનગર જિલ્લાના કેટલાક તાલુકામાં આજે પણ વાવણી લાયક વરસાદ વરસ્યો નથી. નહિવત વરસાદ પડયો હોવાથી આજ સુધી વાવણી થઇ નથી જેને લઈને ખેતરો સુક્કાભઠ્ઠ ભાંસી રહ્યા છે. અને જગતનોતાત કાગ ડોળે ધરતીના ધણીની રાહ જોઇ રહ્યો છે. જો ટૂંક સમયમાં વરસાદ નહી આવે તો મગફળી, કપાસ સહિતના પાકના વાવેતરનો સમય પૂર્ણ થઇ જશે આથી ખેડૂતોના માથે ઉપાધિના વાદળો ઘેરાયા છે.