છોટા ઉદેપુરઃ ભારતના રાષ્ટ્રીય ચિહ્ન 4 સિંહની મુખાકૃતિ નજર સામે આવતા જ તમામ દેશવાસીઓની છાતી ગજ ગજ ફુલી જાય છે. દરેક દેશવાસીને તેના પર ગર્વ હોય છે. દેશની કોઈ પણ સરકારી કચેરી હોય કે પછી કોઈ યોજના તેમાં રાષ્ટ્રીય ચિહ્ન અચુક જોવા મળે છે. રાષ્ટ્રીય ચિહ્નની આન બાન અને શાન જાળવવી એ દરેક દેશવાસીની ફરજ હોય છે.
ત્યારે છોટાઉદેપુર જિલ્લામાં રાષ્ટ્રીય ચિહ્નની ગરીમાને હાની પહોંચાડવામાં આવી છે. જિલ્લા ગ્રામ એજન્સી દ્વારા સરકારી શાળા અને પંચાયત ઘરો પર જે ભીંત ચિત્રો બનાવવામાં આવ્યા છે. તેમાં રાષ્ટ્રીય ચિહ્નનું માન ન જળવાતા લોકોમાં રોષ જોવા મળી રહ્યો છે.
દેશની દરેક કચેરી હોય કે પછી સરકારના કોઈ ડોક્યુમેન્ટ લેટરપેડ તે તમામ વસ્તુ પર રાષ્ટ્રીય ચિહ્ન હોય છે. પાસપોર્ટના પણ મુખ પૃષ્ઠ પર આ ચિહ્નને અગ્રીમતા આપવામાં આવી છે. તો કેન્દ્ર સરકારના સ્વચ્છતા અભિયાનનો સંદેશો ગામડે ગામડે સુધી પહોંચે તે માટે ભીત ચિત્રો જાહેર રસ્તા પંચાયત ઘરો શાળાઓમાં દોરવામાં આવી રહ્યા છે.
ત્યારે છોટા ઉદેપુર જિલ્લાના પણ ગામડાઓમાં આ પ્રકારના ભિંત ચિત્રો દોરવા માટે જિલ્લા ગ્રામ વિકાસ એજન્સી દ્વારા રૂપિયા 20 લાખનો કોન્ટ્રાક્ટ આપવામાં આવ્યો છે. પરંતુ કોન્ટ્રાક્ટર દ્વારા જે ભિંત ચિત્રો તૈયાર કરાયા છે તેમાં આપણું રાષ્ટ્રીય ચિહ્ન ભીંત ચિત્રની એક દમ નીચે ખૂણામાં દોરવામાં આવ્યું છે. જે રાષ્ટ્રીય ચિહ્નનું અપમાન કહેવાય...
તો રાષ્ટ્રીય ચિહ્નના અપમાનને લઈ કાયદાના નિષ્ણાંતો પણ નારાજ જોવા મળી રહ્યો છે. તેમણે જવાબદારો સામે કાર્યવાહીની માગણી કરી છે.
જ્યારે રાષ્ટ્રીય ચિહ્નના અપમાનને લઈ જ્યારે અમારી ટીમે જિલ્લા ગ્રામ વિકાસ એજન્સીનો સંપર્ક સાધ્યો ત્યારે તેમણે સુધારો કરવાનું આશ્વાસન આપ્યું છે.
તબેલામાંથી ઘોડા છુટી જાય પછી તાળા મારવાનો શું મતલબ ? હાલ છોટાઉદેપુર જિલ્લા વહીવટી તંત્રના એવા હાલ થયા છે. જિલ્લા વિકાસ એજન્સી જવાબદાર લોકો સામે કાર્યવાહી કરવાનું આશ્વાસન તો આપે છે. પરંતુ અહીં સવાલ થઈ રહ્યા છે કે દેશની આન બાન અને શાનનું આ પ્રકારે અપમાન કરવું કેટલું ઉચીત છે.
તો કોન્ટ્રાક્ટરને કામ કોઈ જ્ઞાન ચકાસ્યા વીના જ આપી દેવામાં આવ્યું ? તો આક્ષેપો તો એવા પણ થઈ રહ્યા છે કે કોઈ પણ ટેન્ડર પ્રક્રિયા વગર મળતીયાઓને કામ શોંપી દેવામાં આવ્યું છે. ત્યારે દેશનું પણ સન્માન ન જાળવી શક્તા આવા લોકો સામે ક્યારે કડક કાર્યવાહી થાય છે તે જોવું રહ્યું...