હાલમાં જ ધોરણ 10 બોર્ડની પરીક્ષા પૂર્ણ થઈ છે. જેમાં સૌ કોઈએ પોતાની મહેનતને કલમ થકી કાગળ પર ઉતાર્યું. પરીક્ષા આપવું એ આજકાલ ઘણા બાળકો માટે એક ઉત્સવ સમાન બની ગયું છે. તેમજ પરીક્ષામાં સારી મહેનત કરીને સારું પરિણામ મેળવતા હોય છે. ત્યારે એક અફઘાનિસ્તાનના મહિલાની તસવીર આજકાલ ખુબજ વાયરલ થઈ છે. વાયરલ તસવીરને ઘણા લોકો શેર કરી રહ્યા છે અને આ મહિલાના વખાણ કરી રહ્યા છે.
આ મહિલાની ચર્ચા સોશિયલ મીડિયામાં એટલા માટે છે કારણ કે આ મહિલા પોતાના બાળકને સાથે રાખીને પરીક્ષા આપી રહી છે. અફઘાનિસ્તાનમાં રહેતી આ મહિલાનું નામ છે જહાન તાબ. તે નિલી શહેરમાં નાસિરખુસરો હાયર એજ્યુકેશન ઈંસ્ટિટ્યૂટમાં સોશિયલ સાયન્સની પરીક્ષા આપી રહી હતી કે ત્યારે તેની તસવીર કેમેરામાં કેદ કરવામાં આવી હતી. તેનું બાળક વારંવાર રડી રહ્યું હતું જેને ચુપ કરાવવાની સાથે ધીરે ધીરે તે પરીક્ષા પણ આપી રહી હતી. જહાનને એક બેન્ચ આપવામાં આવી હતી. પરંતુ સાથે બાળક હોવાથી તેણે નીચેજ બેસીને પરીક્ષા આપવાનું પસંદ કર્યું.
જહાનની તસવીર પોસ્ટ કરીને ઘણાએ તેને પ્રેરણાદાયક ગણાવ્યા. તો ઘણાએ તેને એક મજબૂત મહિલા ગણાવી. જહાનના લેક્ચરરે જણાવ્યું કે જહાનને પરીક્ષા આપવા માટે 6 કલાકની મુસાફરી કરવી પડી હતી અને જે બાદ તે પરીક્ષા આપી શકી. જહાનના લગ્ન એક ખેડૂત સાથે થયા છે.
પરંતુ તેણે અભ્યાસ ચાલુ રાખવાનો નિર્ણય લીધો હતો અને હવે એક બ્રિટિશ સંસ્થા તેના ભણતરના ખર્ચ માટે આગળ આવી છે. આમ જો કાળા માથાનો માનવી ધારે તે કરી શકે. એ કહેવત જહાને સાબિત કરી બતાવી છે મુશ્કેલી ગમે તેટલી હોય. પરંતુ મન મક્કમ હોય તો મુશ્કેલીઓ પાર કરી શકાય છે.